Portlashda zarar koʻrgan binolar ochiqlandi
Toshkent shahar hokimi v.b Shavkat Umrzoqov bu haqda axborot bergan.
Toshkentning Sergeli tumanidagi portlash oqibatida 26 ta koʻp qavatli uydagi 592 ta xonadon hamda 8 ta xizmat koʻrsatish shoxobchasi, 1 ta maktab va 2 ta MTT binolarining fasad qismi hamda deraza-romlariga zarar yetgani aniqlandi.
Bu haqda Toshkent shahar hokimi v.b Shavkat Umrzoqovning yuz bergan favqulodda holat sabablarini oʻrganish, koʻrilgan talafotlarni bartaraf etish va jabrlanganlarga yordam koʻrsatish boʻyicha olib borilayotgan ishlar yuzasidan dastlabki axborotida aytildi.
Shuningdek, hududdagi 24 ta koʻp qavatli uy va 25 ta hovlining fasad, oyna-rom va tom qismi zarar koʻrgan.
Eslatib oʻtamiz, 28 sentabr soat 02:43 da Toshkent shahar Sergeli tumani "Quruvchilar" dahasida joylashgan omborxonalarning birida kuchli portlash boʻlgandi.
Hodisa oqibatida 15 yoshli oʻsmir halok boʻlgan, Ochilboy Ramatov boshchiligida hukumat komissiyasi tuzildi, shuningdek jinoiy ish ham ochildi.
FVV maʼlumotiga koʻra, omborxonalar hududidagi yongʻin qariyb 7 soatda oʻchirildi.