Тошкент вилоятида сиам эгизаклари туғилди
Улар Чирчиқ шаҳридаги тиббиёт марказида ноёб операция орқали ажратиб олинди.
Тошкент вилоятида сиам эгизаклари дунёга келди. Ўзбек шифокорлари сиам эгизакларини шошилинч равишда ноёб операция орқали ажратиб олди. Бу ҳақда ССВ хабар берди.
Чирчиқ шаҳрида жойлашган Республика ихтисослаштирилган она ва бола саломатлиги илмий-амалий тиббиёт марказининг Тошкент вилояти филиалида ноёб операция ўтказилди.
Ҳомиладорликнинг 33-34-ҳафтасида “кесарча кесиш” йўли билан муддатидан аввал дунёга келган сиам эгизаклари туғуруқдан 9 соат ўтиб, шошилинч равишда, устига-устак, маҳаллий шароитда ўта мураккаб амалиёт орқали ажратиб олинди.
Беш соат давом этган юқори технологик операция Республика перинатал маркази қошидаги Неонатал хирургия маркази раҳбари, тиббиёт фанлари доктори, профессор Бахтиёр Эргашев бошчилигидаги бир гуруҳ малакали мутахассислар томонидан бажарилди.
Соғлиқни сақлаш вазири Асилбек Худаяров ушбу чақалоқлар ҳолидан хабар олди.
Сиам эгизакларини ажратиб олиш операциясида иштирок этган бир гуруҳ мутахассислар вазир А.Худаяров томонидан “Ўзбекистон Республикаси соғлиқни сақлаш аълочиси” кўкрак нишони билан тақдирланди.
Саломатлиги яхшиланган чақалоқлар ва уларнинг онасига шифохонадан уйига жавоб берилди.