Канадада Либерал партия сайловларда ғалаба қозонди
Бош вазир Майк Карни ғалаба нутқида "Америка хавфи" ҳақида гапирди ва мамлакат ҳеч кимга қўшилмаслигини айтди.
Канада Бош вазири Марк Карни 29 апрел куни федерал сайловлардаги ғалаба қозонганини эълон қилди.
У ўз нутқида АҚШ Президенти Доналд Трамп томонидан қўйилган кескин савдо божлари ва доимий таҳдидлар соясида қолиб кетган сайлов кампаниясидан сўнг, унинг давлати ҳеч қачон Қўшма Штатларга бўйсунмаслигини айтди.
Сайловчилар Канаданинг Либерал партиясини кетма-кет тўртинчи муддатга ҳокимиятга келтирдилар. Бироқ Карни кўпчилик ўринларни қўлга киритганми ёки ҳукумат тузиш учун бошқа партиялар билан ҳамкорлик қилишига тўғри келадими — ҳозирча номаълум.
Ҳукуматни мустақил шакллантириш учун партия 172 та ўринга эга бўлиши керак.
CNN ҳамкорлари бўлган CTV нашри Карни етакчилигидаги партия озчилик ҳукумати тузишини тахмин қилмоқда.
CBC эса ҳозирча улар кўпчиликни қўлга кирита олган-олмаганини аниқлаш учун ҳали эрта экалигини маълум қилган.
Мухолифатдаги Консерватив партия етакчиси Пер Полев сешанба тонгида мағлубиятини тан олиб, Карни озчилик ҳукумати тузиш учун етарли ўринларни қўлга киритганини айтди.
Либерал партия етакчиси Марк Карни Трампнинг АҚШ ва Канадани бирлаштириш ҳақидаги таклифи ҳамда "Ўзини канадаликман деган ҳар бир кишини бирдек ҳимоя қилиш" ҳақидаги фикрини кескин танқид қилди.
"Мен бир неча ойдан бери огоҳлантириб келмоқдаман — АҚШ бизнинг еримиз, сувимиз, табиий ресурсларимиз ва давлатимизга кўз олайтириб келмоқда. Бу шунчаки таҳдидлар эмас. Президент Трамп Канадани бўлиб юбориб, кейин бизни бўйсундирмоқчи. Сизни ишонтириб айтаманки, бу ҳеч қачон рўй бермайди", — деди Карни.
У сайлов кампанияси давомида айтган сўзларини яна бир бор такрорлаб, Канада ва АҚШ ўртасидаги муносабатлар тубдан ўзгарганини таъкидлади.
“Америка хиёнатидан олинган зарба ортда қолди, аммо бу сабоқларни ҳеч қачон унутмаслигимиз керак. Биз, энг аввало, ўз манфаатларимизни ўйлашимиз ва, энг муҳими, бир-биримизга ғамхўрлик қилишимиз керак”, — дея қўшимча қилди у.
Маълумот ўрнида, 60 ёшли собиқ Марказий банк раҳбари Марк Карни ўтган ой собиқ Бош вазир Жастин Трюдо истеъфога чиққанидан сўнг партия етакчилиги учун ўтказилган сайловда катта устунлик билан ғалаба қозониб, Трампга қарши кайфият тўлқинини бошлаб берди. У АҚШ Президентининг Канадани “51-штат” сифатида қўшиб олиш таҳдидларига қарши чиқди ва мамлакат мудофаасини ўз сиёсий дастурининг марказий нуқтасига айлантирди.
