ҲАМАС уруш тугаганини эълон қилди, Исроил келишувни маъқуллади: тафсилотлар
АҚШ томонидан илгари сурилган келишувга ҳар иккала томон рози бўлди. ҲАМАС АҚШдан муҳим кафолатлар олганини билдирди.
ҲАМАС гуруҳи Исроил билан уруш тугаганини эълон қилди.
Гуруҳнинг бош музокарачиси Халил ал-Ҳайянинг сўзларига кўра, ҲАМАС АҚШ ва воситачилардан сулҳ битимининг биринчи босқичи “Ғазодаги урушнинг мутлақ тугашини” билдириши бўйича кафолат олган.
Доналд Трамп дастлаб Исроил ва ҲАМАС Ғазодаги можарога барҳам бериш бўйича тинчлик режасининг биринчи босқичини имзолаганини эълон қилди. ҲАМАС буни тасдиқлади.
Ал-Жазира телеканалига кўра, келишувнинг дастлабки қисмида маҳбуслар алмашинуви ва Исроил қўшинларини Ғазодан олиб чиқиб кетиш кўзда тутилган.
Келишувга кўра, Исроил можаро бошланганидан бери умрбод қамоқ жазосига ҳукм қилинган 250 нафар фаластинликни ва 1700 нафар ғазоликни қўйиб юборади.
Ал-Ҳайянинг қўшимча қилишича, сулҳ узоқ муддатли ўт очишни тўхтатишга, гуманитар ёрдам импортига ва Миср билан чегара пунктининг очилишига олиб келади.
Трампнинг тинчлик режаси доирасидаги кейинги қадамлар ҳали ҳам муҳокама қилинмоқда. Ҳарбий ҳаракатлар тугаганидан кейин Ғазо секторини бошқариш масалалари ва ҳалигача қуролсизланиш талабларини рад этиб келаётган ХАМАСнинг якуний тақдири ҳал этилмаган.
Айни пайтда Трамп шартнома имзолаш маросимида қатнашиш учун Мисрга бориш режасини маълум қилди.
"Мен у ерга боришга ҳаракат қиламан. Биз вақтни белгилаш устида ишламоқдамиз ва Мисрга борамиз, у ерда шартномаларни имзолашимиз керак бўлади", - деди АҚШ президенти.
Исроил томони ҳам Ғазо секторида гаровга олинганларни озод қилиш ва қўшинларни анклавдан олиб чиқишни ўз ичига олган Ғазо секторида ўт очишни тўхтатиш келишувини маъқуллади.
Бош вазир Бинямин Нетаняху буни “муҳим воқеа” деб атади ва АҚШ президенти Доналд Трампга, шунингдек, Вазирлар Маҳкамаси йиғилишида иштирок этган унинг махсус вакили Стив Уиткофф ва АҚШ президентининг куёви Жаред Кушнерга миннатдорчилик билдирди.
Трампнинг сўзларига кўра, исроиллик гаровга олинганлар ҲАМАС асирлигидан “13 ёки 14 октябр куни” озод этилиши мумкин.
Вазирлар Маҳкамаси йиғилиши олдидан келишув доирасида Исроил умрбод қамоқ жазосини ўтаётган 250 нафар маҳбусни озод қилиши кераклиги маълум қилинди.
Трамп Исроил ва ҲАМАС Ғазода тинчлик ўрнатишнинг биринчи босқичига келишиб олганини айтди.
Лекин Исроилнинг ўта радикал Миллий хавфсизлик вазири Итамар Бен-Гвир "террорчиларни озод қилиш бўйича келишувга" овоз бера олмаслигини айтган.
Аввал Исроил ва ҲАМАС тинчлик режасининг биринчи босқичига рози бўлгани хабар берилганди.