Тошкентда салкам 47 гектар ер ўзбошимчалик билан эгаллаб олингани аниқланди
Энг кўп ҳуқуқбузарлик Миробод, Мирзо Улуғбек, Сергели, Олмазор ва Яшнобод туманларида қайд этилди.
Тошкентда салкам 47 гектар ер ўзбошимчалик билан эгаллаб олингани аниқланди.
Жорий йилнинг ўтган 9 ойи давомида Кадастр агентлиги Тошкент шаҳар бошқармаси томонидан ер ва кадастр назорати йўналишида қатор ишлар амалга оширилди.
Ўтказилган ер ва кадастр назорати тадбирлари натижасида 3 112 та ҳолатда 46,85 гектар ерлар ўзбошимчалик билан эгаллаб олинганлиги аниқланди. Энг кўп ҳуқуқбузарлик пойтахтимизнинг Миробод, Мирзо Улуғбек, Сергели, Олмазор ва Яшнобод туманларида қайд этилди.
Кадастр ходимлари томонидан берилган ёзма кўрсатмалар, олиб борилган тушунтириш ишлари натижасида 2 006 та ҳолатда 16,47 гектар ер қонун бузилиш ҳолати фуқаролар томонидан ихтиёрий равишда бартараф этилишига эришилди.
Ер участкаларини қайтариш ва уларда қурилган иморатларни бартараф этиш бўйича 1 106 та ҳолатда 30,38 гектар ер майдони билан боғлиқ ҳолатлар юзасидан судларга даъво аризалари киритилди.
Ҳуқуқбузарлик ҳолатида жиноят аломатлари мавжуд бўлган 28 та иш ҳужжати ўрнатилган тартибга мувофиқ прокуратура органларига киритилди.
Юқоридаги ўзбошимчалик билан эгаллаб олинган ҳолатлар Ўзбекистон Республикасининг 2024 йил 5 августдаги 937-сон Қонуни талабларига мутаносиб эмас.
Айнан шунинг учун ҳам ушбу жойларда ер ва кадастр назорати тадбирлари амалга оширилди.
Аввалроқ Самарқанддаги танқидий йиғилишда етти нафар кадастрчи ишдан олинганди.
Ўнга яқин ходимларга нисбатан интизомий жазо чоралари қўлланилган. Улар аҳолидан тушаётган аризаларни асоссиз рад этиб, эътиборсиз қолдирган.