Ўтган йили йирик солиқ тўловчиларнинг давлат бюджетидаги улуши камайди
Солиқ ва божхона тўловлари сезиларли кўтарилгани боис, бизнес ва аҳолидан ундириладиган солиқлар ўсган.
2023 йилда бюджетга тушумларнинг ўсиши секинлашган. 2022 йилда бюджет даромадлари 22,4 фоизга ўсган бўлса, 2023 йилда бу кўрсаткич 14,8 фоиз бўлган холос.
2023 йилги давлат бюджети ижроси тўғрисидаги “Фуқаролар учун бюджет” нашрида шундай маълумотлар келтирилади.
Солиқ ва божхона божлари сезиларли кўтарилгани боис, бизнес ва аҳолидан ундириладиган солиқлар ўсган. Хусусан, ер солиғидан тушумлар 29,9 фоизга, мол-мулк солиғидан тушумлар 27 фоизга, жисмоний шахсларнинг даромад солиғидан тушумлар 23,25 фоизга, божхона божларидан тушумлар эса 67,2 фоизга ошган.
Лекин шунга қарамасдан, давлат бюджети даромадлари ўсиши секинлашганини йирик солиқ тўловчиларининг бюджет тушумларининг улуши қисқаргани билан изоҳлаш мумкин.
Жумладан, энг йирик солиқ тўловчилар – Навоий кон металлургия комбинатининг улуши 0,41 фоизга, Олмалиқ кон металлургия комбинатининг улуши эса 2,38 фоизга, Ўзбекистон металлургия комбинатининг улуши эса 0,34 фоизга камайган.
Бир қатор энергетика корхоналарининг ҳам бюджет тушумларидаги улуши ўтгагн йилдагидан кам бўлган. Мисол учун Ўзбекнефтегазда – 0,22, Ҳудудгахтаъминотда – 0,21, Ўзтрансгазда – 0,92, “Бухоро нефтни қайта ишлаш заводи”да – 0,16, “Uz-Kor Gas Chemical”да - 0,25, Ўзбекистон металлургия комбинатида – 0,34 фоизли пасайиш кузатилган.
