"Гаров" филми: қаҳрамонлик, муҳаббат ва адреналинга йўғрилган драма

Бугун пойтахтимиздаги Ўзбекистон Миллий кино санъати саройида “Гаров” филмининг ёпиқ премьераси бўлиб ўтди. Мудофаа вазирлиги, Миллий Гвардия ва “Biz Media” платформаси ҳамкорлигида яратилган ушбу бадиий филмнинг илк намойишида ҳарбий хизматчилар, ҳарбий ӯқув юртларт курсантлари ва киносанъаткор ва актёрлар иштирок этишди.

Platina.uz мухбири ҳам ушбу филм премьерасида қатнашиб, унинг илк томошабинларидан бири бӯлди.

Фильм нима ҳақда?

Жангари фильмларнинг ҳам ўз мухлислари бор. Қалбидаги ғайрати ва мардлиги жўш уриб турадиган томошабин жангари ва ҳарбий мавзудаги фильмларни кўриб, ўзига хос завқ ва дам олади. Саргузашт, авантюра ва адреналинга бўлган эҳтиёжини бир қадар қондиради.

Афсуски, охирги йилларда Ўзбекистон кинобозорида бу жанрда маҳорат билан ишланган дурустроқ фильмларни санаб бериш қийин. Чунки бу йўналишдаги фильмларни яратиш учун нафақат кучли ва мантиқ-маъноси мукаммал сюжетга асосланган сценарий, балки жиддий моддий-техник тайёргарлик, шунингдек, тажрибали актёр, каскадёр ва консультантлар жамоаси ҳам талаб этилади. Шу сабабдан бўлса керак, мамлакатимиз киносаҳналарида таклиф этилаётган, бу жанр ихлосмандларининг кўнглига мос келиши мумкин бўлган киномаҳсулотларнинг деярли барчаси хорижники - Голливуд-у-Болливудники. Улар ҳам фақат рус тилида намойиш этилмоқда.

Лекин вазиятни тўғри англаган бир гуруҳ ижодкорлар жамоаси томошабинларимизнинг ҳақли талабларига муносиб жавоб беришнинг уддасидан чиқишди. Давлат бюджетига юк бўлмаслик учун жамоа ижодкорларининг шахсий маблағлари асосида фильм суратга олиб, ана шу бўшлиқни тўлдиришга муваффақ бўлишди. Улар яратган “Гаров” фильмида мазкур жанрнинг энг ёрқин ютуқлари ҳамда юксак ватанпарварлик, муҳаббат ва бурч тушунчалари самарали тарзда уйғунлашган.

Оғир танлов: ватан ва оила

Ҳар бир инсон ҳаётида танловлар қилишига тўғри келади. Бу танловлар баъзан унинг келажагини белгилаб беради. “Гаров” фильмида айнан шундай қисмат чизиқлари кесишган қаҳрамонларнинг юракни ларзага солувчи ҳикояси акс этган.

Фильмнинг марказида турли ҳаётий муаммолар ичида яшайдиган қаҳрамонлар бор. Тоҳир (махалла раиси), Саодат (хотин-қизлар фаоли) ва Иқбол (участка инспектори) ўзларининг жонкуяр фаолиятлари орқали маҳалланинг тинчлиги ва аҳиллигини сақлашга интилган шахслар сифатида акс эттирилган. Бундан ташқари, фильмда ёшларнинг ҳаёти ва қарашларига ҳам алоҳида эътибор қаратилган.

Фильмда икки дўст — Арслон ва Бунёд ўртасидаги қарама-қаршилик муҳим ўрин тутади. Бирининг ҳарбийликка бўлган қизиқиши, иккинчисининг эса бу касбга бефарқлиги ҳатто масхараомуз муносабати орқали ёшлардаги дунёқаршнинг фарқли қирралари намоён этилади. Айни пайтда фильм армия ҳаётининг шиддатли ва машаққатли жиҳатларини ҳам очиб беради.

Арслон ҳарбий хизматни орзу қилади, у юрт ҳимояси учун бор имкониятларини ишга солишга тайёр. Аммо Бунёд буни аҳамиятсиз нарса деб ҳисоблайди. Унинг бефарқлиги, бир қарашда, унинг ўз йўлига эга инсон эканлигини кўрсатгандек туюлиши мумкин. Бироқ реал ҳаёт унинг қарашларини қандай синовдан ўтказишини кузатиш томошабинга ўзгача мароқ бағишлайди.

Шу билан бирган, фильмда подполковник Жалилов, майор Хўжамбердиев ва лейтенант Тўхтаев каби ҳарбийлар орқали юрт ҳимоясида собит турган, ватан хавфсизлиги йўлида хизмат қилаётганларнинг жасорати тасвирланади.

Драматик кескинлик: гаровга олинганлар ва жиноятчилар ўртасидаги зиддият

Яхши одамлар бор жойда, афсуски, ёмон ниятли шахслар ҳам учрайди. Аслида, фильмнинг асосий драматик ўқи подполковник Жалилов ва жиноий гуруҳ бошлиғи Акмал ўртасидаги қарама-қаршилик орқали шаклланади. Акмал ўз ўғлини қамоқдан озод қилишларига эришиш учун зобит Жалиловнинг қизи Асални ва бир нечта маҳалла аҳлини гаровга олади. Ҳарбий зобит Жалилов қалбидаги оғир танлов ва туйғуларига қарамасдан, ўз бурчига хиёнат қилмайди ва босқинчиларга қарши ақлли режа ишлаб чиқади. У бу зиддиятдан ютуқ билан чиққан ҳолда, ўз жасоратини намоён этади. Антагонист қаҳрамон Акмалнинг қўлидаги қурол ва таҳдидлар зобитни синдириш ўрнига, унинг жасоратини янада чархлайди. Ниҳоят, қишлоқ четида кечган шиддатли қуролли тўқнашув ҳарбийларнинг жанговар маҳоратларини ва уларнинг қай даражада аниқ ва совуққон ҳаракат қилишини кўрсатади. Бу воқеалар қатъийлик ва жасорат инсонни қандай ўзгартира олишини намоён қилади.

Шу боисдан, ишонч билан айтиш мумкинки, мазкур фильм фақат жанг ҳақида эмас. Бу фильм ватан ва оила, бурч ва муҳаббат, ирода ва жасорат тўқнашган ўзига хос маънавий майдонни акс эттиради. Ҳарбийликка бефарқ бўлган ёш йигит Бунёд бошидан ўтказган воқеалар оқибатида ўз фикрини ўзгартиради ва ватан ҳимоячиси бўлиш истиқболига ҳавас билан қарай бошлайди.

Техник ижро ва актёрлик маҳорати

Фильм визуал жиҳатдан ҳам юқори савияда суратга олинган. Постановкачи оператор Элмурод Йўлдошев камера ҳаракатлари орқали реализм ва экшн-шиддатни тасвирлашда усталик намойиш қилган. Ҳарбий саҳналар динамикаси фильмга кучли таъсир қўшади, айниқса, қуролли тўқнашувлар мукаммал суратга олинган.

Фильмда бош ролларни ижро этган актёрлар ўз образларини ишончли ва таъсирли тарзда намоён этганлар.

Хусусан, Тоҳир Саидов, Бобур Йўлдошев ва Мираваз Солихов каби актёрлар ўз қаҳрамонларининг ички кечинмалари ва туйғуларини юксак маҳорат билан акс эттиришган.

Улар ўз қаҳрамонларини жонли ва ишонарли тасвирлашга муваффақ бўлишган. Ишончимиз комилки, улар акс эттирган ҳар бир нигоҳ, ҳар бир ҳаракат томошабинга таъсир қила олади, уларни фильмдаги ҳаётга янада чуқурроқ шўнғитади.

Энг муҳими, фильмнинг асосий муҳити драматик кескинлик ва характерлар ўртасидаги қарама-қаршиликлар билан бойитилган. Тасвирланган воқеалар реалистик ва таъсирли тарзда ёритилгани сабабли, томошабин сюжетни қизиқиш билан кузатишда давом этади.

“Гаров” фадиий фильм жанридаги катта устунликлардан бири – унинг шиддатли ва ҳақиқий жанг саҳналари ҳисобланади. Ҳарбийлик ва жиноий олам ўртасидаги тўқнашувлар режиссёр томонидан аниқ, деталларга эътибор берилган ҳолда суратга олинган. Қуролли тўқнашув ҳамда отишмалар, қўл жанги ва шиддатли қувиш саҳналари фильмнинг динамикасига катта ҳисса қўшган.

Фильмнинг яна бир муҳим жиҳати – унда ватанпарварлик руҳи кучли ёритилган. Қаҳрамонларнинг жасорати, бурчга садоқати ва ватан ҳимоясига бўлган муносабати томошабинни руҳлантиради ва ижобий ҳиссиётлар уйғотади. “Гаров”га ўхшаган киноасарлар нафақат катталар, балки ёш авлод учун ҳам катта тарбиявий аҳамиятга эга.

Шунчаки жангари фильм эмас!

Умуман олганда, “Гаров” нафақат ҳарбий ва жиноий жанрдаги фильм, балки инсон қалбидаги бурч, жасорат ва муҳаббатни ўрганувчи драматик асардир. Мазкур фильм нафақат жанговар саҳналарга бой, балки чуқур маънога эга бадиий асар ҳамдир. Унда ватанга садоқат, бурчга эҳтиром ва жасорат мавзулари муваффақиятли ёритилган. Динамик воқеалар, кучли ҳиссий кескинлик ва таъсирли актёрлик ижроси “Гаров” фильмини алоҳида ажралиб турадиган асарга айлантиради, фильмнинг нафақат томошабоп ва кассабоп, балки тарбиявий ва маънавий жиҳатдан ҳам муҳим эканлигини тасдиқлайди.

Ушбу картина томошабинларга ўз ҳаётий қарашларини қайта баҳолаш, ватанпарварлик ва жасорат тушунчаларини англашга туртки беради. Ҳеч шубҳасиз, ватан ҳимоячиларига бўлган ҳурмат. фидойилик ҳамда ватанпарварлик руҳини шакллантиришда бу каби фильмларнинг аҳамияти катта.

Агар сиз нафақат жанговор ва экшн саҳналар, балки инсон руҳияти борасида ўйга толдирадиган кинокартиналарни ҳам хуш кўрсангиз, унда “Гаров” фильми айнан сиз учун! Кетган вақтингизга ачинмайсиз.

Абулфайз Сайидасқаров