АҚШ паспорти халқаро рейтингда кучли ўнликка кира олмади

АҚШ тарихда биринчи марта дунёнинг энг қудратли паспортлари рейтингидаги энг кучли 10 таликка кира олмади.

Марказий Осиё давлатлари орасида Қозоғистон паспорти энг кучлиси бўлиб, 67-ўринни эгаллаган ва 78 та давлатга визасиз кириш имконига эга. Ўзбекистон эса 82-ўринда, 61 та давлатга визасиз кира олади.

Henley Passport Index — паспортлар бўйича машҳур халқаро рейтинглардан биридир. Унинг 20 йиллик тарихида илк бор АҚШ паспорти энг кучли 10 талик рўйхатдан чиқиб қолди.

Ҳозирда учта Осиё давлати рўйхатнинг энг юқори поғонасини эгаллаган:

Сингапур — 193 та давлатга визасиз кириш ҳуқуқига эга, Жанубий Корея — 190 та давлатга, Япония — 189 та давлатга кириш имконига эга.

АҚШ Малайзия билан биргаликда 12-ўринга тушган. Ҳар икки давлат фуқаролари Халқаро ҳаво транспорти ассоциацияси (IATA) маълумотларига кўра, 227 та мамлакатдан 180 тасига визасиз кира олади.

2014 йилда АҚШ биринчи ўринни эгаллаган эди, ҳатто жорий йилнинг июль ойида ҳам у ҳали ҳам энг кучли 10 талик рўйхатда эди.

Пасайиш сабаблари

Апрел ойида Бразилия ўзаро жавоб чораларининг йўқлиги сабабли АҚШ, Канада ва Австралия фуқаролари учун визасиз кириш ҳуқуқини бекор қилди.

Хитой эса, аксинча, кўпчилиги Европа давлатлари бўлган, жумладан Германия ва Францияни ўз ичига олган ўнлаб мамлакат фуқароларига визасиз кириш имконини берувчи сиёсатни жорий этмоқда — бироқ АҚШ бу рўйхатга киритилмади.

Папуа-Янги Гвинея ва Мянма ҳам ўз кириш сиёсатларини ўзгартирди, бу эса бошқа мамлакатлар паспортларининг рейтингини ошириб, АҚШникини янада пасайтирди. Henley индексининг сўнгги ҳисоботида айтилишича, АҚШ учун сўнгги зарба Сомалининг янги электрон виза тизимини жорий этиши ва Ветнамнинг визасиз кириш имконига эга мамлакатлар рўйхатидан АҚШни чиқариб ташлаши бўлган.

2015 йилда индексда биринчи ўринни эгаллаган Буюк Британия паспорти ҳам ўз тарихидаги энг паст даражага тушди — у июль ойидан бери икки поғонага пасайиб, 6-ўриндан 8-ўринга тушган.

Сўнгги ўн йилликда АҚШ ва Буюк Британия паспортларининг кучсизланишига тескари равишда, Хитой эса сезиларли ўсишни қайд этмоқда — у 2015 йилдаги 94-ўриндан 2025 йилда 64-ўринга кўтарилиб, шу давр мобайнида яна 37 та давлатга визасиз кириш имконини қўлга киритган.

Бирлашган Араб Амирликлари (БАА) ҳам индексдаги энг йирик давлатлардан бири бўлиб, сўнгги ўн йилликда 34 поғонага кўтарилиб, 42-ўриндан 8-ўринга чиқди.

2025 йилнинг энг қудратли паспортлари

1. Сингапур (193 та давлат)

2. Жанубий Корея (190)

3. Япония (189)

4. Германия, Италия, Люксембург, Испания, Швейцария (188)

5. Австрия, Бельгия, Дания, Финляндия, Франция, Ирландия, Нидерландия (187)

6. Греция, Венгрия, Янги Зеландия, Норвегия, Португалия, Швеция (186)

7. Австралия, Чехия, Малта, Полша (185)

8. Хорватия, Эстония, Словакия, Словения, БАА, Буюк Британия (184)

9. Канада (183)

10. Латвия, Лихтенштейн (182)

11. Исландия, Литва (181)

12. АҚШ, Малайзия (180).