26 январь, 2023

Прокурору ИИБ ходимидан киночию "Раматов"чигача: Сурхондарёда ҳокимлар алмашинуви рекорд ўрнатди

Кеча Сурхондарё вилоятининг 13 та туманида ҳокимлар алмашди. Фақат Термиз шаҳри ва Қумқўрғон туманига янги ҳоким тайинланмади, холос. Бундай ёппасига истеъфо ва тайинловлар Ўзбекистон тарихида илк марта кузатиляпти. Ишдан олинган ҳокимларнинг деярли барчаси Тўра Боболов даврида мансабга ўтирган. Янги тайинланган ҳокимлар орасида прокурор, ИИБ мулозимидан тортиб, киночи ва Раматов "ижобий имижи" учун курашган ходим ҳам бор. Қуйида бу мавзуларга алоҳида тўхталамиз. Тайинланганларнинг 11 таси республикадан юборилган бўлиб, бу ҳудудларни ривожлантириш билан изоҳланган. 2 та ҳоким ротация бўлган: Денов ҳокими Бандихонга раҳбар бўлган, Музработ ҳокимининг биринчи ўринбосари эса раҳбар этиб тайинланган. Сариосиёга тайинланган ҳоким Абдуқодир Донаев аввал Тошкент шаҳар Яшнобод тумани прокурори бўлган. Узун тумани ҳокими Ҳабибулла Бозоров эса Тошкент шаҳар ИИББ Жамоат тартибини сақлаш бошқармаси бошлиғи ўринбосари лавозимида ишлаган. Олтинсой тумани ҳокими Баҳром Махматраемов Кинематография агентлиги бош директори ўринбосари сифатида фаолият олиб борган. Қизириқ туманига эса Алкоголь ва тамаки агентлиги директори ўринбосари ҳоким бўлган. Бойсун тумани янги ҳокими Баҳодир Шукуров ҳақида эса алоҳида тўхталиш керак. Чунки у бунгача Бош вазир ўринбосари Очилбой Раматовнинг "ижобий имижи" учун курашган Вазирлар маҳкамаси бош мутахассиси эди. 2021 йилда ўша пайтдаги Экология қўмитаси матбуот хизмати раҳбари Бунёд Абдуллаев Раматовнинг "ижобий имижини шакллантириш кампанияси"да иштирок этишга мажбурланаётганини айтган ва ишдан кетганди. Мажбурлаш жараёнида Раматовнинг маслаҳатчиси ва Вазирлар маҳкамаси ходими (Баҳодир Шукуров) унга қўнғироқ қилган, топшириқларни сўзсиз бажаришни сўраган. Ўшанда Абдуллаев Баҳодир Шукуровдан бу вазифани ёзма равишда беришини талаб қилган. Табиийки, Шукуров бунга кўнмаган. Бу шов-шув ортидан яна 6 киши ишдан олинганди.

Ёппасига тайинловлардан, янги ҳокимлардан бир нима англаш мумкинки, ҳудудларни қаттиққўллик билан бошқариб бўлмайди. Прокурор, ИИБ ходими, солиқчи, иқтисодчи каби мутахассислар янгилик қилишига умид йўқ. Демак, Сурхондарёда ҳозирча креатив раҳбар йўқ, деган хулосага келишга асосимиз етарли.

ЗАҲИРИДДИН