Жиззахда бюджетдан салкам 3 млрд сўм ажратилди
Маблағнинг катта қисми Шароф Рашидов боғининг умумий архитектуравий қиёфасини замонавий кўринишга келтириш учун сарфланади.
Халқ депутатлари Жиззах вилояти кенгаши 10 октябр куни турли мақсадлар учун 2,9 млрд сўм ажратиш ҳақида қарорларни имзолади.
Жумладан, Жиззах шаҳридаги Шароф Рашидов боғининг умумий архитектуравий қиёфасини замонавий кўринишга келтириш учун 1,2 миллиард сўм ажратилади.
Шунингдек, Жиззах шаҳрини ободонлаштириш ва кўкаламзорлаштириш, шаҳар қиёфасини янада яхшилаш учун 1 миллиард сўм маблағни Жиззах шаҳар маҳаллий бюджетига ўтказиб берилади.
Туғуруқ жараёнларида ўткир қон йўқотилиши билан боғлиқ ҳолатларда аутогемо реинфузия операциясини бажариш учун замонавий Cell Saver аппаратини харид қилиш учун эса 730 миллион сўм Республика ихтисослаштирилган Она ва бола саломатлиги илмий-амалий тиббиёт маркази Жиззах филиалига ажратилади.
Барча маблағлар вилоят маҳаллий бюджети даромадлари режасининг ошириб бажарилган қисми ҳисобидан сарфланади.