Қувондиқ Санақулов Ўзбекистон гандбол федерацияси раиси этиб сайланди
Санақулов "Навоий кон-металлургия комбинати" бош директори лавозимида ҳам ишлаб келмоқда.
Қувондиқ Санақулов Ўзбекистон Гандбол федерацияси раиси лавозимига сайланди.
Миллий Олимпия қўмитасида Спорт вазирлиги ва МОҚ раҳбарияти иштирокида мамлакат гандбол федерациясининг навбатдан ташқари ҳисобот-сайлов конференцияси ташкил этилди. Унда федерацияга янги раҳбар сайланди ва Лос-Анжелес-2028 ёзги Олимпия ўйинларига тайёргарлик режаси кўриб чиқилди.
Тадбирда “Навоий кон-металлургия комбинати”нинг бош директори, "Ўзбекистон Қаҳрамони" Санақулов Қувондиқ Саноқулович номзоди Ўзбекистон гандбол федерацияси раиси лавозимига илгари сурилди.
Делегатлар ушбу номзодни бир овоздан маъқуллашди ва Қувондиқ Санақулов мамлакат гандбол федерацияси раиси лавозимига сайланди. Санақулов 2015 йилда "Ўзбекистон Қаҳрамони" унвонига сазовор бўлган.
Йиғилиш давомида Ўзбекистон гандбол федерациясининг Лос-Анжелес-2028 ёзги Олимпия ўйинларига тайёргарлик режаси ҳам кўриб чиқилди.
