Германияда Гитлерга тегишли қароргоҳ ёниб кетди
Германия полицияси бинога қасддан ўт қўйилган бўлиши мумкин деб тахмин қилмоқда. Воқеа жойида бир мотоциклчи гумонланувчи сифатида ҳибсга олинган.
Германияда Адолф Гитлернинг собиқ қароргоҳи бўлган Kehlsteinhaus, шунингдек, "Бургут уяси" номи билан ҳам танилган жойда ёнғин содир бўлди.
Bild нашри хабар беришича, нацистлар етакчисининг қароргоҳи бўлиб хизмат қилган бино бутунлай аланга ичида қолган.
Германия полицияси бинога қасддан ўт қўйилган бўлиши мумкин деб тахмин қилмоқда. Воқеа жойида полиция бир мотоциклчини гумонланувчи сифатида ҳибсга олган.
Дастлабки маълумотларга кўра, ёнғин пайтида бинода ҳеч ким бўлмаган ва ҳеч ким жароҳатланмаган. Ёнғиндан чиққан ёруғлик бир неча километр узоқликда кўриниб турган.
Полиция вакили Лиза Майернинг таъкидлашича, ўт ўчирувчилар 1834 метр баландликда жойлашган иншоотга кириш имкони йўқлиги сабабли ёнғинни ўчиришда қийналмоқда, деб хабар беради Agence France-Presse.
Бино 1937-1938 йилларда Гитлер учун қароргоҳ сифатида қурилган, бироқ диктаторнинг ўзи у ерга жуда камдан-кам ташриф буюрган. Иншоот Иккинчи Жаҳон урушидан деярли зарар кўрмаган. Бугунги кунда мажмуа Бавария федерал штатига тегишли ва унинг ҳудудида тарихий кўргазма жойлашган.
