Миробод ҳокими ички ишлар ходимлари байрами учун 130 млн сўм маблағ ажратди
Миробод туман ҳокимининг 25 октябрь куни “Ички ишлар ходимлари” кунига атаб маблағ ажратиш бўйича қарори e-qaror платформасида эълон қилинди.
Тошкент шаҳар Миробод туман ҳокимлиги Ўзбекистон Республикаси “Ички ишлар ходимлари” куни муносабати билан маблағ ажратди. Бу ҳақда ҳоким Анвар Сайфутдинов 16 октябрь куни қарор имзолаган.
Қарорга кўра, туман ҳокимлигининг маҳаллий бюджет захира жамғармаси маблағлари ҳисобидан жами 130 млн сўм маблағ ажратилган. Бундан ички ишлар ходимларига совға-салом харид қилиш учун 40 млн сўм, байрам дастурхони учун 90 млн сўм ажратиш белгиланган.
Ушбу фармойиш ижросини назорат қилиш эса туман ҳокимининг ўринбосарлари Саидрасул Саидханов ва Ашраф Салайдинов зиммасига юклатилган.
Эслатиб ўтамиз, аввалроқ Тошкент шаҳар ҳокими Шавкат Умурзоқов Тошкент шаҳар Оила ва хотин-қизлар бошқармасининг туман бўлимлари раҳбарларига бириктирилган хизмат автомобилларининг айрим харажатлари учун бюджетнинг захира жамғармаси ҳисобидан жами 180 млн сўм ажратган эди.
