Путинга қарши, Трамп фойдасига ишлаётган Эпштейн можароси

АҚШ адлия вазирлиги жинсий жиноятлар учун ҳукм қилинган ва қамоқда вафот этган Жеффри Эпштейн иши бўйича миллионлаб янги ҳужжатларни эълон қилди. Бу – Эпштейн файлларининг ошкоралиги тўғрисидаги қонун қабул қилинганидан бери оммага тақдим этилган энг катта ҳажмдаги ҳужжатлардир. 30 январ куни 3 миллион саҳифа, 180 мингта фото ва 2 мингта видео материаллар махфийликдан чиқиб, омма учун эълон қилинди.

Нашр АҚШ президенти Доналд Трамп томонидан белгиланган, Эпштейн ишига алоқадор барча ҳужжатларни ошкор қилишни талаб этувчи муддат ўтганидан олти ҳафтадан сўнг амалга оширилди.

Расман олганда, гап 2025 йилда АҚШ конгресси томонидан қабул қилинган ва президент Доналд Трамп томонидан шахсан имзоланган “Эпштейн файлларининг шаффофлиги тўғрисидаги акт” ижроси ҳақида бормоқда.

Лекин бу материалларни чоп қилиш ҳақидаги қарор кўпроқ ихтиёрий эмас, балки мажбурий тусга эга эди, чунки АҚШ президенти Доналд Трампнинг ўзи ҳам ушбу материалларда 38 минг мартадан ортиқ тилга олинади. Бироқ қонуннинг ўзи адлия вазирлигини материалларни босқичма-босқич эълон қилишга мажбур қиларди ва жараённи тўхтатишга уриниш Оқ уй маъмуриятининг АҚШ конгресси ва Америка суд тизими билан очиқдан-очиқ тўқнашувини англатган бўлар эди.

Ҳужжатларда Жеффри Эпштейннинг қамоқда бўлган даврига оид тафсилотлар, психологик хулоса, қамоқда вафот этгани ҳақидаги ҳисобот, шунингдек, Эпштейннинг шериги бўлган ва вояга етмаган қизларнинг савдосида ёрдам бергани учун ҳукм қилинган Гислейн Максвеллга нисбатан олиб борилган тергов материаллари мавжуд. Шунингдек, Эпштейн ва юқори лавозимли шахслар ўртасидаги электрон ёзишмалар яна қайта эълон қилинди. Табиийки, Трамп ҳозир президент бўлгани учун у билан боғлиқ айрим маълумотлар устига қора тасма тортилган.

Эпштейннинг шубҳали ҳаёти

Жеффри Эдвард Эпштейн 1953 йилда Ню-Йоркда туғилган америкалик одам савдоси билан шуғулланган шахс, машҳур амалдорлар ва бойларни рус фоҳишалари ва вояга етмаган қизлар билан таъминлаб турган қўшмачи педофил, бир неча марта жинсий зўравонликлар содир этган шахс, машҳур молиячи миллиардердир. У 1976 йилда мактабдан ишдан бўшатилгандан сўнг, банк ва молия соҳасида иш бошлаб, ўз компаниясини ташкил этгунга қадар Bear Stearns компаниясида турли лавозимларда фаолият юритган.

Эпштейн ўз атрофида элита вакилларидан иборат мулоқот доирасини шакллантирган ва камида 1000 нафар вояга етмаган қиз ҳамда аёлларни ёллаган. Улар Эпштейннинг ўзи ва унинг шериклари томонидан бир неча бор зўрланган, хўрланган ва айримлари бедарак йўқолган. Эҳтимол ўлдирилган.

Гарчи аввалдан одамлар бу борада тасдиқланмаган шубҳаларга эга бўлса-да, синчков журналистлар ўтказган суриштирувлар можарони бошлаб берди. Натижада 2005 йилда Флорида штати, Палм-Бич шаҳри полицияси Эпштейнга нисбатан тергов бошлади. Бунга сабаб – ота-оналардан бири унинг 14 ёшли қизига нисбатан жинсий зўравонлик қилингани ҳақида мурожаат қилгани бўлган. Федерал ходимлар Эпштейн томонидан жинсий зўравонликка учраган, айримлари атиги 14 ёшда бўлган 36 нафар қизни аниқлашган.

2008 йилда Эпштейн ўз айбини тан олган ва Флорида штати суди томонидан болаларни фоҳишаликка жалб қилиш ҳамда фоҳишаликка ундаш жиноятлари учун жазога ҳукм қилинган. АҚШ адлия вазирлиги вакили Александр Акоста билан тузилган баҳсли айбни тан олиш келишуви доирасида у фақат шу икки жиноят учун жавобгарликка тортилган ва тахминан 13 ой қамоқда бўлган.

Далили топилмаган маълумотларга кўра, Эпштейн оролларида барча қабоҳат ва шаҳвоний гуноҳлар амалга оширилган: баччабозлик, оммавий оргия, педофилия, ҳайвонлар билан алоқа, садомазохизм ва ҳоказо бузуқликлар амалга оширилган.

2019 йил 6 июлда эса Жеффри Эпштейн Флорида ва Ню-Йорк штатларида вояга етмаганларни жинсий эксплуатация қилиш мақсадида одам савдоси билан шуғулланганлик бўйича федерал айбловлар асосида яна ҳибсга олинди. У 2019 йил 10 август куни ўз қамоқхона камерасида ўзини осиб ўлдирган. Шу ерда ҳам айримлар унинг ўз ихтиёри билан ўлганини инкор этишади. Эмишки, айрим қудратли одамлар Эпштейн гувоҳ сифатида яшаб қолишини истамаган ва уни ўлдиртирганмиш. Аммо бу гумонлар текширилмади ва табиийки, тасдиқланмади ҳам.

Эпштейннинг ўлими унга нисбатан жиноий жавобгарликни давом эттириш имкониятини йўққа чиқаргани сабабли, 2019 йил 29 августда судя барча жиноий айбловларни бекор қилган.

Эпштейн ўн йиллар давомида Гислейн Максвелл билан яқин алоқада бўлган; у Эпштейн учун ёш қизларни фоҳишаликка ёллаш билан шуғулланган. Бу эса 2021 йилда уни федерал даражада одам савдоси ва тил бириктириш айбловлари бўйича, жумладан, 14 ёшли қизларни болаларга нисбатан жинсий зўравонлик ва фоҳишаликка жалб қилишда иштирок этгани учун жазога ҳукм қилинишига олиб келган.

Эпштейннинг кўтарилиши

The New York Times маълумотларига кўра, Эпштейн ўз бойлигининг катта қисмини миллиардерларга солиқ ва мерос масалалари бўйича хизматлар кўрсатиш орқали тўплаган. Шунингдек, у кенг қамровли танишлар тармоғига эга бўлган, бу тармоққа бизнесменлар, қироллик оилалари аъзолари, сиёсатчилар ва олимлар кирган.

Эпштейннинг молиявий маслаҳатлари асосан солиқлардан қочиш ва меросни бўлишда қонундаги нотўкисликлардан фойдаланиш йўлларини ўргатиш бўлган. Айрим ёзишмаларда Эпштейн солиқдан қочишни эплолмайдиган бойларни “бу “гой”лар (яъни яҳудий бўлмаганлар – муаллиф) ахмоққа ўхшаб солиқ тўлаб юраверсин” дея масхара қилган.

Эпштейннинг Доналд Трамп, Эндрю Маунтбаттен-Виндзор ва Билл Клинтон каби жамоат арбоблари билан дўстлиги катта баҳс-мунозараларга сабаб бўлган. 2025 йил сентябр ойида АҚШ конгрессининг вакиллар палатасида демократлар фракцияси томонидан ошкор этилган ҳужжатлар Эпштейн Питер Тил, Илон Маск, Билл Гейтс, Ларри Саммерс ва Стив Бэннон билан алоқада бўлганини кўрсатади.

2026 йил январь ойида эса Эпштейннинг Эҳуд Барак, Стив Тиш, Ҳовард Лютник, Кэти Руммлер ҳамда Норвегия валиаҳд маликаси Метте-Марит билан кенг кўламли алоқалари мавжудлигини кўрсатувчи янги ҳужжатлар эълон қилинган.

Фош қилинган материалларнинг таъсири

Жеффри Эпштейн иши бўйича янги файлларнинг эълон қилиниши Европада катта можаро ва шов-шувларга сабаб бўлди. Бу эса Ғарб элиталарига бўлган ишончни сусайтириб, Кремл томонидан олиб борилаётган Россия пропагандаси учун қўшимча имконият яратди.

Хусусан, Буюк Британиянинг АҚШдаги собиқ элчиси ва савдо масалалари бўйича Европа комиссиясининг собиқ аъзоси Питер Менделсон Лейбористлар партиясини тарк этди. “Эпштейн файллари”дан бирида у гўёки америкалик молиячи томонидан 75 минг доллар олгани айтилган.

Словакияда Мирослав Лайчакнинг собиқ ташқи ишлар вазири ва ўша пайтда бош вазир Роберт Фицо маслаҳатчисининг номи тилга олинган материалларнинг эълон қилиниши – унинг истеъфосига олиб келди.

Шу билан бир вақтда, Эпштейннинг янги файллари қирол Чарлз III нинг укаси шаҳзода Эндрю ишини яна кун тартибига олиб чиқди. Охир-оқибатда, шаҳзода фахрий унвондан маҳрум этилди ва оммавий узрлар янгради.

Бироқ энг кўп эътибор қаратган мамлакат Норвегия бўлди. Эпштейн файллари қироллик саройи ва дипломатик доиралар билан боғлиқ шахсларга, жумладан, Норвегия валиаҳд маликаси Метте-Маритга ҳам дахл қилди.

Нега машҳурлар Эпштейн билан дўст бўлишга интилишган?

Эпштейн атрофидаги тор элита гуруҳи бошқаларга ҳам жозибали кўринган. Бутун дунёнинг зўрлари йиғилган тор ва махфий гуруҳнинг аъзоси бўлиш – худди масонлар каби ёки шайтонпарастлар каби махфий жамоларга мансуб бўлиш – менинг ҳам обрўйимни кўтаради, деб ўйлашган. Бу худди “бойлар Каттасарой тўйхонасида тўй қилади, мен ҳам шу ерда тўй қилсам, ўшалар қаторига қўшиламан”, дейишдек гап. Яъни махфий бренд, тор доирага мансублик иллюзияси, эришиш қийин бўлган мақом уларни ўзига жалб қилган.

Бир қарашда бой амалдор ва Нобел мукофоти олган машҳур зиёли ва олимларнинг Эпштейн оролларидаги турли жинсий бузуқликлар зўравонлик ва ҳатто қотилликларга қўл уришига ҳожат йўқдек кўринади. Ахир бойлар Эпштейнсиз ҳам ўз ҳайвоний нафси ва шайтоний фантазияларини қондириши, пулига истаганча фоҳиша сотиб олиши мумкин. Аммо Эпштейн одамларнинг энг яширин, ҳеч кимга билдириб бўлмайдиган бузуқ орзуларини ҳам амалга ошириш имконини берган. Аёлларни уриб қийнаш, 13-14 яшар қизчаларни ва болачаларни жинсий зўрлаш ва ўлдириш шулар сирасига киради. Улар бу қилмишлари учун жазосиз қолишган: ҳеч ким уларни уялтирмаган, улардан нафратланмаган, ошкор қилиш ва шарманда қилиш билан қўрқитмаган. Чунки атрофдагилар ҳам шу жирканч ишлар билан шуғулланган. Улкан ва ягона, умумий ва шайтоний мақсад уларни жипслаштириб турган. Стенли Кубрикнинг “Катта ёпилган кўзлар билан” филмида тасвирланган махфий бузуқилар жамияти ҳам дунёнинг энг машҳур сиёсатчи ва бойларидан иборат бўлгани аввал эртакдек туюларди. Шунчаки конспирологик афсона деб ҳисоблашар эди. Эпштейн файллари ошкор қилингач, бундай махфий жамиятлар реал ҳаётда ҳам мавжудлиги фош бўлди.

Эпштейннинг асл мақсади нима бўлган?

Эпштейннниг ўзи ҳам табиатан тажовузкор, шаҳвоний бузуқ ва педофил бўлган. “Пес песни қоронғида топади”, деганларидек, умумий махфий гуноҳ ишлар атрофида ўзига хос жамоа шаклланган. Кейинчалик Эпштейн қўшмачи ролини бажарган. Россиядан чиройли қизларни танлаб олиб, модел ва акстриса, массажчи ниқоби остида Эпштейн оролига жўнатадиган модел агентликлари билан алоқа ўрнатган. Дунё бойларига чиройли рус хотин-қизларини етказиб беришни йўлга қўйган. Ошкор қилинган ҳужжатларда айтилишича, машҳур Билл Гейтс ҳам бир рус фоҳишасидан таносил касалини юқтириб олиб, ҳеч кимга айтолмасдан, ўз бузуқи шерикларидан қандай даволансам, дея маслаҳат сўраб хат ёзган. Буларнинг барчасини Эпштейн архив қилиб сақлаб қўяверган. Шаҳвоний оргиялар, жамоавий бузуқилар акс этган видеофайллар сақлаб қўйилган.

Бунга Россиянинг элиталари билан боғлиқ шахслар ҳам аралашган – улар Эпштейнга рус фоҳишаларини етказиб беришда илғор бўлишган.

Хўш, Эпштейн нега бундай қилган? У бойларга қарши компромат тўплаганми? Бунга ҳожати йўқ бўлган. Шундоғам ҳамма элита у билан сирдош ва қадрдон эди. Қолаверса, ўлимига қадар у ҳеч кимни бу сирларни фош қилиш билан қўрқитиб, шантаж қилишга уринмаган ҳам.

Эпштейн – Исроил ва Россия агенти сифатида

Эпштейн файллари яна бир сирни ошкор қилди! Ғарб разведкачиларининг таҳлилий хулосаларига кўра, Жеффри Эпштейн Россия махсус хизматлари – Федерал хавфсизлик хизмати, яъни ФСБ учун ишлаган экан. Бундан ташқари, у, катта эҳтимол билан Кремл ва шахсан президент Путин билан ҳам ҳамкорлик қилган. Британия ва Америка ОАВларининг ёзишича, буларнинг барчаси Россия махсус хизматларининг АҚШ ҳудудида амалга оширилган энг йирик махсус операцияси бўлиши мумкин. 2021 йилда журналистик суриштирувлари билан машҳур Крейг Уингернинг ёзишича, Эпштейн асосан рус қўшмачилари хизматидан фойдаланган. Бу операция Москванинг Америкадаги президент сайловларига аралашувидан ҳам анча кенг кўламли ва арқони узун ташланган махфий операция бўлган. Путин Ғарб етакчилари устидан жуда катта компроматга эга бўлган.

Файлларда “Россия”, “Путин”, “Кремл” сўзлари жуда кўп марта тилга олинади. Асосан америкалик ва британиялик ОАВлар, шунингдек АҚШ терговчилари ва федерал хизматлар фикрича, Эпштейн оролида ўнлаб йиллар давомида содир бўлган барча воқеалар Россия федерал хавфсизлик хизмати – “ФСБ” томонидан кузатиб борилган. Бу операция орқали катта ҳажмда маълумотлар, далиллар ва компромат тўпланган.

Жеффри Эпштейн АҚШ элитаси билан яқин алоқада бўлган шахс бўлса-да, аввалбошдан россиялик чекистлар, Лубянка билан ҳамкорликда ишлаган ва шахсан Путин билан муносабат ўрнатган бўлиши мумкин. У, шунингдек, сионист яҳудий сифатида Исроил ва унинг Моссад развекдасига ҳам компроматлар етказиб турган.

Федерал қидирув бюросининг хизмат хатида айтилишича, Эпштейн АҚШ ва Исроил разведка хизматлари билан ҳамкорлик қилган. У Исроилнинг собиқ бош вазири Эҳуд Барак билан яқин бўлган ва унинг раҳбарлиги остида разведка тайёргарлигидан ўтган.

Эпштейннинг ороллари, вилла ва яхталари тўлиқ махфий видеокамералар билан жиҳозланган бўлган. Америка федерал органлари бу камераларга фақат кейинги йилларда, Эпштейн қамоқда бўлган пайтда ва унинг ўлими олдидан бошланган тергов жараёнидагина кириш имконига эга бўлишди. Аммо америкалик амалдорлар, президентлар, собиқ президентлар, сиёсатчилар, йирик бизнесменлар ва миллиардерлар, ижтимоий фикрга таъсир қилувчи шахслар ҳақидаги бу видеолар йиллар давомида Исроил ва Россияга оқиб бориб турган.

Эпштейн Россиядан, жумладан, Краснодар ва бошқа ҳудудлардан “модел” сифатида келтирилган рус фоҳишаларидан фойдаланган. Бу масала аслида анчадан бери маълум, бу ҳақда марҳум Владимир Жириновский ҳам гапирган. Айтганча, Эпштейн ҳужжатларида Жириновский ўғил болаларни ўпишни ёқтиргани, Путин эса қизларни ёқтиргани ҳақида ёзилган. Бу ҳақда КГБ тизимидан чиққан, ҳозир ҳаётда бўлмаган генераллар ва нафақадаги собиқ чекистлар ҳам кўп марта айтишган.

Ҳеч кимга сир эмас, махсус хизмат вакиллари чиройли қизларни ёки бесоқолбозлик учун чиройли болаларни керакли объектлар тўшагига ташлаб, кейин яширин суратга ва видеога олиб, шантаж қилган. Ёки агентликка, яъни қулоқликка ёллаб, улардан маълумот олиб турган ёки ўз махфий топшириқларини бажаришга мажбур қилган.

Эпштейн ороллари ва яхталаридаги бузуқликлар миллиардерларга оила қуришда ҳам фойда берган. Масалан, Европа шаҳзодларидан бири ўзининг бўлажак хотинини илк марта шу оргияларда топган. Шаҳзода официантлик қилиб юрган бир ёш фоҳиша қизни севиб қолган ва унга уйланиб, маликага айлантирган. Эпштейн Доналд Трампни ҳозирги 1-хоним Мелания билан танишитирган. Мелания у пайтларда модел сифатида шундай тадбирларда қатнашган.

Трампга фарқи йўқми?

Ҳозир кўпчилик “бу файллар Доналд Трапмни президентликдан кетказиш ёки қандайдир қўшимча жиноят ишлари очилишига сабаб бўлади”, деб ўйлаяпти. Лекин Трамп пинагини ҳам бузгани йўқ. Тўғри, барча миллиардерлар каби у ҳам Эпштейн билан гаплашиб юрган, суратга тушган зиёфатларда бирга ўтирган. Аммо унинг бузуқлик авж олган оролига борганини рад этмоқда. Аксинча, бу файллар Трамп фойдасига ишлаяпти. Чунки файлларда шарманда қилинган сиёсатчиларнинг аксарияти демократик партия аъзолари. Республикачи Трамп бу фактдан қурол сифатида фойдаланмоқда.

Эпштейн Путинга пул берганми?

Шу ўринда АҚШ разведкасининг боқи беғамлигини ҳам қайд этиш жоиз. Исроил ва Россия жосуслари Эпштейн оролидан унумли фойдаланиб, компромат йиғаётганидан уларнинг хабари бўлмаган. Акс ҳолда дарров бунга чек қўйишар эди. Ўз президентлари ёки сиёсатчиларини огоҳлантирарди.

Америка ФҚБнинг махфий ҳисоботларидан бирига кўра, Эпштейн Путинни молиялаштирган, деган иддао ҳам бор, аммо бу техник таржима хатоси бўлган. Аслида, эҳтимол, Эпштейн Россиядан пул олган ва унинг бир қисмини ФСБга узатиб турган.

Эҳтимол ФСБ тайёрига айёр бўлиб, Эпштейн иш бошлаганида уни шантаж қилиб агент сифатида ёллагандир, эҳтимол аввалбошдан бу Путиннинг режаси бўлгандир, буни аниқ айтиш қийин. Бироқ Путин ташқи сиёсатда катта гапириб, хўрозланган даврлар айни Эпштейн оролида бузуқликлар авж олганидан кейин кузатилган. Путиннинг 2007 йилда Мюнхенда нутқ сўзлаб, илк марта Ғарбга таҳдид солишга журъат қилгани, 2014 йилда Қримни босиб олгани, 2022 йилда эса жаҳон ҳамжамияти ва Ғарбдан тап тортмасдан Украинага бостириб кирганига қараганда, Путин ўша даврдаёқ анча-мунча компромат йиға олган. Ҳозирда эса Москванинг қўрқмасдан Марказий Осиё ва Кавказ давлатларига таҳдид солаётгани, бироқ жойлардаги етакчилар индамай туришгани ҳам турли шубҳалар уйғотади.

Бир сиёсатчининг айтишича, Путин ўзаро суҳбатларда музокара олиб бормайди, у сиёсатчиларни агент бўлишга ёллашга уринади. Бунинг учун уларга компроматлар, яъни обрў тўкиши мумкин бўлган материалларга шаъма қилган ёки кўрсатган бўлиши ҳам мумкин. Шу боис, Европанинг ҳар қандай сиёсатчиси шердек шиддат билан Путин олдига борса-да, кейинчалик сувга тушган мушукдек қайтиб кетишгани бежиз бўлмаса керак. Ҳатто Трамп ҳам бир кунда Украина урушини тинчитаман деб бекорга айтмаган. Таҳдид қилсам ёки молиявий фойда ваъда берсам, Путин дарров рози бўлади, деб ўйлаган. Бироқ ўзаро суҳбатдан кейин попуги пасайиб, Путинга ён боса бошлади. Қолаверса, Путининг доим рақибларига қарата “юзма-юз суҳбатлашиб олайлик, муаммони ҳал қиламиз” қабилида гапиришида ҳам жон борга ўхшайди.

Хуллас, Эпштейн ва Москва ўртасидаги алоқалар ўз исботини топди. Эпштейн мунтазам Москвага бориб-келиб турган. Унда Россиянинг 6 ойлик иш визаси бўлган ва у доим узайтириб турилган. Қизиқ жиҳати, Эпштейнга виза беришда “таклиф этувчи тараф” сифатида ФСБ пенсионерлари ва ветеранларининг нодавлат ташкилоти – “Вимпил” кўрсатилган.

Эпштейн Россия ташқи ишлар вазири Сергей Лавровни ва Кремлдаги кўплаб шахсларни таниган, ҳатто Путин билан учрашган бўлиши мумкин, деган тахминлар бор.

Шу боис, америкалик федераллар ва журналистлар Эпштейн Кремлдаги энг юқори лавозимли шахслар билан алоқада бўлган бўлиши мумкинлигини истисно қилишмаяпти. Бу Россия куч тузилмалари қандай ишлашини очиб беради.

Америкада рус жосуслик тармоғининг кучайиши

Эпштейн, шунингдек, россиялик амалдорларга, аниқроғи, уларнинг болаларига Америка бизнес тузилмаларига киришда ёрдам берган. Улар эса ФСБ учун маълумот тўплашган. Масалан, 2006 йилдан токи ўлгунича – 2017 йилгача Россиянинг БМТдаги доимий вакили бўлган марҳум Виталий Чуркиннинг ўғлига ҳам Эпштейн ёрдам бергани ҳақида маълумотлар бор.

Эпштейн файлларида Чуркин билан ёзишмалар бўлиб, Чуркин унга ўғлини Америкада яхши ишга жойлагани учун миннатдорлик билдирган ва ҳатто уни ўғлининг устози деб мақтаган. Шу тариқа, Эпштейн рус агентурасига ҳам АҚШда илдиз отишига ёрдам берган.

Ҳозир ҳамма Билл Гейтс, Илон Маск, Трамп ва бошқалар ҳақида гапиряпти. Лекин ҳақиқатнинг кўзига тик қараш керак. Асосий муаммо бу эмас. Асосий таҳдид – Россия махсус хизматларининг Америкада муваффақиятли операциялар ўтказаётганида! Wikileaks можароси, Россияга сотилган америкалик таҳлилчи Сноуден воқеси, АҚШ президентлик сайловларига аралашув, киберхужумлар – бу ҳаммаси Россия учун самарали бўлган кенг кўламли операциялардир.

Путиннинг ғалабаси

Ҳозир АҚШда Эпштейн можароси катта ижтимоий-сиёсий хаосга сабаб бўлмоқда, Россияга қарши турувчи демократларнинг обрўси тушиб кетмоқда. Путин айнан шундай бўлишини истайди – хаос яратиш, ваҳимага солиш, америкаликларни бир-бирларига ишонмасликка ўргатиш, рейтингларни пасайтириш, конгрессда мураккаб вазият яратиш, Миннеаполисдаги каби кичик инқилобий ҳаракатлар учун шарт-шароит яратиш. Бу Москва қўли билан бўлаётган ишлар айсбергининг бизга ошкор чўққиси холос. Ҳа, бу фақат бошланиши бўлиши ҳам мумкин. Кейинчалик, эҳтимол Россия янада катта, янада очиқ ва агрессив операцияларни Америкада амалга оширишга тайёрланмоқда ёки амалга оширишга улгурган. Эпштейн иши эса фақатгина ушбу йиллар давомида режалаштирилган ва амалга татбиқ этилган катта кампаниянинг, воқеалар занжирининг бир элементи бўлади.

Буни ўзига хос “Совуқ уруш 2.0” деб аташ мумкин.

Эпштейн ва Ўзбекистон

Эпштейнга доир эълон қилинган ҳужжатлар орасида бир маълумот ўзбек интернет сегментида ҳам қизиқиш уйғотди. Бу ҳужжатлар орасида Эпштейннинг Самарқандда туғилган қиз билан ёзишмалари мавжудлиги аниқланди. Эълон қилинган материалларда АҚШ расмийларининг эҳтиётсизлиги сабабли мазкур аёлга тегишли шахсий (яшаш манзили ва паспорт) маълумотлар очиқ ҳолатда қолиб кетган. Ёзишмалар 2012-2014 йиллар орасида олиб борилган бўлиб, уларда ишчан мулоқот билан бирга шахсий мазмундаги хабарлар, жумладан, молиявий ёрдам сўровлари мавжуд.

Ўзбекистонлик қиз Эпштейнга Самарқанддаги университетда ўқиш билан боғлиқ муаммолари ва хорижда таҳсил олиш режалари ҳақида ёзган. У Эпштейннинг адвокати орқали 5400 АҚШ доллари миқдорида пул олган. Бу маблағ Парижда жойлашган New York Film Academy филиалидаги ўқув курслари учун мўлжалланган, шунингдек, қиз авиачипталар билан ҳам таъминланган.

Самарқандлик қизнинг Францияда қолиб иш топиш уринишлари муваффақиятсиз якунланган ва 2014 йил охирида у Ўзбекистонга қайтган.

Эпштейн ҳужжатларида ўзбекистонлик қизнинг жинсий эксплуатацияга учраганига оид тўғридан-тўғри далиллар мавжуд эмас. Лекин ўзаро ёзишмаларда Эпшгтейн бу қиздан яланғоч ҳолда турли секс-тадбирларда қатнаша оладими-йўқми, сўраб кўрган. Шуниси аниқки, Эпштейннинг нафақат Россия, балки бошқа постсовет ҳудудларидан чиққан қизларни ҳам фаҳш ишларга чақирганига оид маълумотлар мавжуд.

Инсон ҳуқуқлари ҳимоячилари, айниқса, ушбу аёлнинг паспорт маълумотлари, тўлиқ исми ва Самарқанд ҳуқуқни муҳофаза қилувчи органига оид маълумотлар очиқ ҳолда эълон қилинганидан жиддий хавотир билдиришган.

Каъбапўш Эпштейнинг қўлига қандай қилиб тушиб қолган?

Албатта, Эпштейн ҳужжатларида тилга олинган элита вакилларининг ҳаммаси ҳам унинг уйидаги жинсий бузуқликларга шерик бўлмаган. Масалан, Эпштейннинг уйида муқаддас Каъбани қоплаш учун ишлатиладиган кисва матосининг бўлаклари топилган. Файлларни ўрганиш шуни кўрсатадики, каъбапўшнинг қисмлари Бирлашган Араб Амирликлари билан боғлиқ ташкилотлар орқали келишув асосида АҚШга юборилган ва Жеффри Эпштейнга етказиб берилган.

2017 йил феврал ва март ойлари билан саналанган ёзишмаларга кўра, БААлик ишбилармон аёл Азиза Ал-Аҳмадий Абдуллоҳ ал-Маарий исмли шахс билан ҳамкорликда кисвага алоқадор учта буюмни етказиб берган. Хабар қилинишича, у Эпштейнга матонинг диний аҳамияти ҳақида ёзган.

Азиза Ал-Аҳмадий электрон ўйинлар ишлаб чиқариш билан шуғулланувчи компанияга эгалик қилади, ўзини қироллик саройининг маслаҳатчиси деб ҳисоблайди. Унинг Жеффри билан танишуви Эпштейн қироллик саройига хат юбориб, биткоин ва бошқа рақамли валюталарга ўхшаш, “Шариат” деб аталадиган исломий рақамли валюта яратиш ниятини билдирганидан сўнг бошланган. Азиза бу ғояга қизиқиб қолиб, Эпштейн билан мулоқот қилишга тушган. Эпштейн уни АҚШдаги таъсирли доиралар билан таништирган. Азиза эса ўз навбатида уни Саудия Арабистонида қарор қабул қилувчи раҳбарлар ва нуфузли шахслар билан боғлаган. Мақсад шундан иборат эдики, ушбу америкалик яҳудий Саудия Арабистони номидан ҳаракат қилиб, рақамли валюта яратишни ва уни саудиялик, исломий ва ҳалол деб тақдим этган ҳолда бутун мусулмон оламига жорий этишни истаган.

Улар ўртасида кенг кўламли ёзишмалар бўлган, аммо ушбу электрон мактубларга кўра, Азиза ҳеч қандай ахлоқсиз ҳаракатларга аралашмаган ва машҳур оролга ташриф буюрмаган.

Эпштейнга оид барча файллар эълон қилиндими?

Бу ҳужжатлар эълон қилиниши Эпштейн ишига оид файлларни ошкор қилиш жараёнининг якунланганини англатадими-йўқми – аниқ эмас.

Бош прокурор ўринбосари Бланшнинг айтишича, ушбу нашр “ҳужжатларни аниқлаш ва текшириш бўйича ўта кенг қамровли жараённинг якунланишини англатади”, бу эса Адлия вазирлиги учун иш тугаганига ишора қилади.

Бироқ демократлар вазирлик ҳеч қандай асоссиз жуда кўп ҳужжатларни – эҳтимол, тахминан 2,5 миллион файлни – яширганини таъкидлашда давом этмоқда.

Оқибати нима бўлади?

Россия сенатори Алексей Пушковнинг фикрича, Эпштейн иши бўйича тергов бошланмасдан туриб якунланади. Бу шов-шувларнинг барчаси рэппер Пи Диддининг шов-шувли “оқ тунлари” каби “портламаган бомба” бўлиб қолади.

“Бу ишга жуда кўп одамлар аралашган, исмлар ҳаддан ташқари машҳур, жуда кўп ишларни очишга тўғри келар эди… Ушбу жанжал гирдобида Ғарбнинг катта сиёсати ва бизнесидаги жуда йирик шахслар чўкиб кетиши мумкин эди. Шунинг учун, эҳтимол, тергов бошланмасдан турибоқ якунланади. Қўзғалган жамоатчиликка эса тинчланиш таклиф этилади. АҚШ тарихида бу ҳолат кўп бор кузатилган”, – деди Пушков.

Лекин нима бўлганда ҳам кучли карталар очилди. Ахборот бомбаси отилди. Қандай портлаши ва кимларга жабр беришини эса вақт кўрсатади.

Абулфайз Сайидасқаров