Париж кўчаларида юзлаб тракторлар намойишга чиқди

Париж кўчаларига 350 трактор чиқди: фермерлар савдо битимига қаршилигини шу тарзда билдирди.

Паст даромадли, ЕИ ва Жанубий Америка савдо келишуви оқибатларидан хавотир билдирган франциялик фермерлар сешанба куни Париж марказида тракторлар билан норозилик намойиши уюштириб, парламент биноси олдига йўл олди.

Франциялик фермерлар паст даромадлар ва Европа Иттифоқининг Жанубий Америка билан тузилган савдо келишуви туфайли ўз тирикчиликларига таҳдид борлигидан хавотир билдирган. Улар бугун Париждаги парламент томон тахминан 350 та трактор билан норозилик намойиши ўтказди.

Фермерлар тош ётқизилган Париж кўчалари бўйлаб тракторларини ҳайдаб, даромадларнинг камлиги ҳамда ЕИ–Жанубий Америка савдо битимига қарши чиқишди.

Полиция ҳамроҳлигида ҳаракатланган тракторлар Шан-Элизе ва Парижнинг бошқа кўчаларидан ўтиб, тирбандлик вақтида шаҳар ҳаракатини издан чиқарди ҳамда Сена дарёси устидан ўтиб, Миллий Ассамблеягача етиб борди.

Франция ва бошқа Европа мамлакатларида фермерларнинг норозилиги бир қатор муаммолар фонида кучайиб бормоқда. Бугунги намойишларга бошчилик қилган касаба уюшмалари Франциянинг озиқ-овқат хавфсизлигини ҳимоя қилиш учун аниқ ва фавқулодда чоралар кўришни талаб қилаётганини билдирди.

Франция ҳукумати вакили Мод Брежон TF1 телеканалига берган интервьюсида ҳукумат фермерларни қўллаб-қувватлаш бўйича яқин вақт ичида янги баёнотлар берилишини айтди.

Президент Эммануэл Макрон ва унинг ҳукумати Европа Иттифоқи билан "Mercocur" ўртасидаги савдо битимига қарши чиқмоқда. Бироқ ЕИ давлатларининг аксарияти уни қўллаб-қувватлаётгани сабабли, келишув 17 январь куни Парагвайда имзоланиши кутилмоқда.

Европалик фермерлар Бразилия, Аргентина, Боливия, Парагвай ва Уругвайни ўз ичига олган "Mercocur" мамлакатлари билан савдо битимини узоқ вақтдан бери танқид қилиб келади. Уларнинг таъкидлашича, ушбу келишув бозорни арзон импорт маҳсулотлари билан тўлдириб юбориши мумкин.