Танзания президенти сайловда салкам 98 фоиз овоз билан ғалаба қозонди

Намойишларга қарамай Танзания президенти Самиа Ҳассан сайлов ғолиби деб эълон қилинди.

У деярли 98 фоиз овоз олди, натижада сайловни мутлоқ ғолибига айланди.

Бир неча кунлик норозиликлардан сўнг Танзанияда президент сайлови якунланди. Бироқ сайлов кузатувчилари ва Европа парламенти аъзолари овоз бериш жараёнининг шаффофлигига шубҳа билдиришди. Шу билан бирга, мамлакат бўйлаб зўравонлик билан кечган намойишлар юз берди.

Танзания Марказий сайлов комиссияси шанба куни мамлакат президенти Самиа Сулуҳу Ҳассан 97,66 фоиз овоз билан президент сайловида ғолиб чиққанини эълон қилди. У шу тариқа 29 октябр куни бўлиб ўтган сайловда барча округларда устунликни қўлга киритди.

Сайлов жараёни баҳсли бўлиб, Ҳассаннинг асосий рақиблари сайловда иштирок этишдан четлаштирилгани сабабли жараён адолатлилиги юзасидан саволлар пайдо бўлган.

Асосий мухолифат партияси "Чадема" сайловда иштирок этишдан четлаштирилган эди. Партия вакили Жон Китока Ҳассаннинг ғалабасини “демократик жараён устидан кулиш” деб атади ва халқаро нуфузли ташкилотни янги сайловни назорат остида ўтказишга чақирди.

“Танзания хавфсизлиги масаласида баҳс бўлиши мумкин эмас — мамлакат тинчлиги ва хавфсизлигини таъминлаш учун барча имкониятлардан фойдаланамиз,” деди Ҳассан.

Сайлов натижалари эълон қилингач, Танзаниянинг йирик шаҳарларида зўравон норозилик намойишлари бошланди. Намойишчилар президент Самиа Сулуҳу Ҳассаннинг асосий рақиблари сайловдан четлаштирилганини ва мамлакатда “кенг кўламли босим” мавжудлигини танқид қилдилар.

Хавфсизлик чораларига қарамай, сайлов куни тартибсизликлар бўлиб ўтди. Гувоҳларнинг айтишича, айрим намойишчилар Ҳассаннинг баннерларини йиртиб ташлаган, ҳукумат биноларига ўт қўйган, полиция эса кўздан ёш оқизувчи газ ва ўқ ишлатган.

Интернет кузатув тармоғи NetBlocks маълумотларига кўра, сайлов куни ва ундан кейин бир неча шаҳарларида ижтимоий тармоқларга ҳамда мобил интернетга кириш чекланган.