МДҲда биринчи марта: ICTWEEK’да UZTELECOM 10,16 Gbit/s тезликдаги U6G (5G-Advanced) технологиясини тақдим этди

UZTELECOM: оддий алоқадан – рақамли экотизимгача

Замонавий футуристик услубда интерактив экранлар билан жиҳозланган стендда МДҲда илк бор амалга оширилган технологиялар намойиш этилди. Ташриф буюрувчилар янги хизматларни синаб кўриш, 10 Gbit/s тезликдаги реал интернет кўрсаткичларини кузатиш ва U6G мобил алоқа имкониятлари билан танишиш фурсатига эга бўлди. Бу эса ҳам бизнес, ҳам жисмоний шахслар учун жаҳон даражасидаги хизматлардан фойдаланиш имконини яратади.

Симли интернет ва мобил алоқада илғор технологиялар: МДҲда биринчи марта U6G (5G-Advanced) технологияси жорий этилди

ICTWEEK 2025 доирасида компания МДҲда биринчи марта U6G диапазонидаги 5G-Advanced технологиясини намойиш этди. Бу воқеа Ўзбекистонда мобил алоқанинг янги авлодини бошлаб берди ва энг кам кечикиш билан 10 Gbit/s гача тезликка эришиш имконини яратди. Намойиш вақтида реал тезлик 10,16 Gbit/s гача етиб, инфратузилманинг амалий қўлланишга тайёрлигини тасдиқлади.

U6G частотаси интернетнинг энг юқори тезлигини таъминлаб, стратегик устунлик яратади. Бу 6G технологиясига тайёр инфратузилмани шакллантириш орқали Ўзбекистоннинг илғор рақамли ечимлар маркази сифатидаги мавқеини мустаҳкамлашга хизмат қилади.

"Ўзбекистон 5G-Advanced технологияси, яъни U6G частота диапазони билан олдинга улкан қадам қўймоқда ҳамда Марказий Осиёда рақамли технологиялар бўйича етакчи ўринларни эгаламоқда. Биз МДҲда биринчи бўлиб 10 Gbit/s тезликдаги оптик толали интернет ва U6G диапазонидаги мобил алоқани ишга тушираётганимиздан фахрланамиз. “Ўзбектелеком” акциядорлик компанияси халқимизга жаҳон даражасидаги ечимларни тақдим этиш учун ўз инфратузилмасини ривожлантиришни давом эттирмоқда", – деди “Ўзбектелеком” АК бошқарув раиси ўринбосари Жавлон Исломов.

Бизнес ва ташкилотлар учун ечимлар

ICTWEEK 2025 доирасида UZTELECOM қуйидаги янги хизматларини тақдим этди:

Булутли хизматлар – Tier III даражасидаги дата-марказда жойлашган виртуал серверлар, сунъий интеллект учун кучли GPU ресурслари, 11 петабайтдан ортиқ ҳажмдаги хавфсиз маълумотлар омбори ва 99,99% ишончлилик.

1C UZTELECOM – миллий стандартларга мос, автоматик янгиланадиган онлайн бухгалтерия ва бошқарув тизими.

UZTELECOM HRM – кадрларни бошқариш учун ягона рақамли платформа: ходимларни ишга қабул қилишдан тортиб, KPI кўрсаткичларини назорат қилиш ва иш вақтини ҳисоблашгача бўлган барча жараёнларни қамраб олади.

Telecom Car – ходимлар учун хизмат автомобилларини тезкор буюртма қилиш сервиси, компания учун эса сафарлар ва харажатларни назорат қилиш имконияти.

Smart Building – AI ва Big Data асосида ишловчи “ақлли бино” ечими бўлиб, ташриф буюрувчилар оқимини реал вақт режимида таҳлил қилади, хавф-хатарларни аниқлайди ва объект эгалари учун самарадорлик ҳамда хавфсизликни оширади.

Киберхавфсизлик – бизнесни ҳимоя қилиш учун комплекс ечимлар мажмуаси: таҳдидларни мониторинг қилиш, DDoS-ҳужумлардан ҳимоя ва рақамли саводхонлик бўйича ўқув платформаси.

Шунингдек, компания корхоналарга мижозлар билан узлуксиз мулоқот олиб бориш ва барча алоқа каналларини бошқаришни енгиллаштирувчи хизматларни ҳам тақдим этди:

Виртуал рақам – интернет ёки алоҳида қурилмасиз ишлайдиган хизмат. Бир вақтнинг ўзида бир нечта қўнғироқни қабул қилиш, автоматик жавоб берувчи, овозли меню, суҳбатларни ёзиб олиш ва статистикани кузатиш имконини беради.

Call-center аутсорсинги – барча қўнғироқларни UZTELECOM операторлари қабул қилади, компанияга эса вақт ва маблағни тежаш имконини беради. Хизмат таркибига кирувчи ва чиқувчи қўнғироқлар, 24/7 техник ёрдам, суҳбатларни ёзиб олиш, таҳлил ва бренд остида шахсийлаштирилган сценарийлар киради.

Омниканал платформа – мижозлар билан мулоқотни ягона тизимда бошқариш имконини берувчи ечим. Чат, мессенжер ва қўнғироқлардан тезкор жавоб, мурожаатлар тарихини сақлаш, CRM интеграцияси, аналитика, сифат назорати ва юкламага мослашувчанликни таъминлайди.

Автоқўнғироқ – хабарнома, эслатма, маркетинг кампаниялари ва фикр-мулоҳазаларни йиғиш учун автоматлаштирилган оммавий қўнғироқлар хизмати.

MyUZTELECOM Super App – UZTELECOM экотизимининг маркази

ICTWEEK 2025’да асосий эътибор MyUZTELECOM Super App иловасига қаратилди. Суперилова янги хизматлар ва функциялар билан бойитилиб, компания экотизимини янада кенгайтирди. Унда қуйидаги хизматлар мавжуд:

Telecom Charger – мамлакат бўйлаб электромобиллар учун қувватлаш станцияларига уланиш.

Travel eSIM – саёҳат пайтида роумингсиз маҳаллий eSIM хизматини фаоллаштириш имконияти.

ATTO – жамоат транспортида тўловни тўғридан тўғри мобил ҳисобдан амалга ошириш.

Telecom TV – премиум контентга эга янги авлод OTT-телевидение хизмати.

Yandex Plus – мусиқа ва кўнгилочар хизматларга обуна.

UZTELECOM Disk – булутли тизимда хавфсиз файл сақлаш хизмати.

Видеокузатув – ақлли камералар ва мобил илова орқали масофадан бошқариш.

Инвестиция – мобил илова орқали компания акцияларини харид қилиш имконияти.

Self-SIM – SIM-картани онлайн фаоллаштириш ва рақам танлаш имконияти.

Шу тариқа, MyUZTELECOM Super App телекоммуникация, финтех, транспорт, медиа ва булутли хизматларни ягона платформада бирлаштирмоқда.

Хулоса

UZTELECOM анъанавий телеком операторидан чиқиб, кенг қамровли рақамли экотизимга айланди. Бугун компания бизнесга – ўсиш ва ривожланиш учун янги имкониятлар, миллионлаб одамларга эса ҳаётни енгил ва қулай қиладиган замонавий IT-ечимларни тақдим этмоқда.