"Ракат" масжиди имом-хатиби Раббимқул Муҳаммадиев вафот этди
У Ҳаж-2025 мавсумида гуруҳ раҳбари сифатида фаолият юритаётган бўлган.
Тошкент шаҳридаги "Ракат" жоме масжиди имом-хатиби Раббимқул домла Муҳаммадиев вафот этди. Бу ҳақда Мусулмонлар идораси хабар берди.
Раббимқул домла 1997 йилдан буён имом-хатиб лавозимида фаолият юритиб келган. Бу йиллар давомида Тошкент шаҳридаги “Оқ тунукали”, “Иброҳим ота”, “Имом Термизий” ҳамда “Ракат” жоме масжидларида хизмат олиб борган.
Айни кунларда Ҳаж-2025 мавсумида гуруҳ раҳбари сифатида сафарбар этилган эдилар.
Маълумот ўрнида, 2025 йил 23 май куни Раббимқул домла Муҳаммадиев “Тошкент-Мадина” йўналишида пойтахтнинг 38-гуруҳ зиёратчилари гуруҳ раҳбари сифатида йўлга чиққан эди.
Шу куни, сафарга чиқишлари билан домла парвоз давомида уйқуга кетган ва шу ҳолатда уйғонмаган. Бемор Мадина халқаро аэропорти шифокорлари томонидан кўрилганда аҳволи ўта оғир, беҳуш, саволларга жавоб бермаган. Шундан сўнг Мадина шаҳридаги "Муовасат" клиникасига жойлаштирилган. Шифокорлар томонидан бош мия қон айланиши ўткир бузилиши, мия ўзаги структуралари ўзгаришлари, бош мия шишиши ташхиси қўйилган.
Малакали шифокорлар томонидан оғир ҳолатдаги бемор нейрохирург кўригидан сўнг бош мия шишини камайтириш мақсадида 2025 йил 24 май куни операция ўтказилди.
Шундан кейин ҳам беморнинг аҳволи оғирлигича сақланиб, 2025 йил 26 май куни эрта тонгда вафот этди.
Бугун, пешин намозидан кейин Мадинаи Мунавварадаги Масжиду Набавийда жаноза намози ўқилиши ва "Бақиъ" қабристонига дафн этилиши режалаштирилган.