АҚШ ва Украина ўртасида ноёб минераллар бўйича битим имзоланди
Украина номидан шартномани Иқтисодиёт вазири Юлия Свириденко имзолади. У табиий минераллар устидан тўлиқ эгалик ва назорат қилиш ҳуқуқи Киев томонида қолишини маълум қилди.
АҚШ ва Украина ўртасида ноёб минераллар бўйича келишув имзоланди.
АҚШ ва Украина “иқтисодий ҳамкорлик” тўғрисида шартнома имзолади. Ушбу келишув АҚШга Украинанинг камёб табиий минералларига эга бўлиш имконини беради. Эвазига эса Украина АҚШдан моддий ёрдам олади.
30 апрел куни АҚШ Молия вазирлиги шартноманинг имзоланганини эълон қилди. АҚШ молия вазири Скотт Бессент: “Президент айтганидек, Америка Қўшма Штатлари бешафқат ва мақсадсиз урушни тугатишни ўзининг асосий мақсади деб билади. Шунингдек, Украина янгидан барпо этилгач, Россияга урушда ёрдам берган ҳеч бир давлатнинг Украинадан фойда кўришига йўл қўймайди”, — дея таъкидлади.
Украина номидан шартномани Иқтисодиёт вазири Юлия Свириденко Вашингтонда имзолади. У Х ижтимоий тармоғидаги саҳифасида шартнома шартларига кўра, табиий минераллар устидан тўлиқ эгалик ва назорат қилиш ҳуқуқи Украина томонида қолишини маълум қилди.
“Бизнинг ҳудуддаги барча ресурслар Украинаники. Украина ўзи кимга нима ажратишни мустақил ҳал қилади”, — дея қўшимча қилди у.
АҚШ ва Украина ўртасидаги ушбу келишувга эришиш жараёни Доналд Трампнинг Оқ уйга қайтишидан сўнг бошланган эди. Шартнома бир неча ҳафталик кескин музокаралардан сўнг имзоланди. Музокаралар давомида Вашингтон ҳаттоки Украинага ёрдамни вақтинча тўхтатиб қўйди.
Украинанинг кўплаб иттифоқчилари узоқ вақтдан бери унинг минерал бойликларига қизиқиб келмоқда. АҚШ Геологик хизмати маълумотларига кўра, энг муҳим ҳисобланган 50 та минералнинг 22 таси Украинада мавжуд. Булар орасида табиий минераллар, электроника ишлаб чиқаришда муҳим аҳамиятга эга бўлган материаллар ҳамда янги энергия технологияларида қўлланиладиган ресурслар бор.
Ўтган йили Байден маъмурияти томонидан ишлаб чиқилган англашув меморандуми АҚШ компанияларига Украинадаги кончилик лойиҳаларига сармоя киритиш имкониятини яратишни кўзлаган эди. Бунинг эвазига Киев иқтисодий имтиёзлар тақдим этиши, шунингдек, қулай бизнес ва экологик шароитларни жорий қилиши лозим эди.
Украина бунга ўхшаш келишувни 2021 йилда Европа Иттифоқи билан ҳам имзолаган.
Эслатиб ўтамиз, жорий йилнинг февраль ойида Украина Президенти Владимир Зеленский Оқ уйга ташриф буюрганидан сўнг, икки давлат раҳбарлари ўртасида тортишув юзага келган эди. Шундан сўнг кўпчилик ушбу келишув амалга ошмаслигини тахмин қилган эди.