Хорватия термаси собиқ футболчиси автоҳалокатда қурбон бўлди
Покривач 2008 йилдан 2010 йилгача Хорватия терма жамоасида ўйнаган ва 15 та учрашувда майдонга тушган.
Хорватия терма жамоасининг собиқ футболчиси Никола Покривач 39 ёшида автоҳалокатда вафот этди.
Хорватия футбол федерациясининг (ХФФ) хабар беришича, собиқ футболчи Никола Покривач 18 апрел куни автоҳалокатда вафот этган.
Ҳалокатда тўрт автомобил тўқнашиб кетган. Покривачдан ташқари яна бир киши ҳалок бўлган. Покривач билан бирга бўлган уч киши жароҳат олган, улардан икки нафарининг аҳволи оғир экани айтилмоқда.
Загребнинг “Динамо” клубининг собиқ ярим ҳимоячиси Покривач 2008 йилдан 2010 йилгача Хорватия терма жамоасида ўйнаган ва 15 та учрашувда майдонга тушган. У, шунингдек, “Монако” ва “РБ Залсбург” каби машҳур жамоалар сафида ҳам тўп сурган.
“Унинг ҳалок бўлганидан сабаб қайғумизни сўз билан ифодалаб бўлмайди”, — дейилади ХФФ баёнотида.
“Мен Николанинг оиласи ва яқинларига чуқур ҳамдардлигимни билдираман. Бу нафақат биз учун, балки бутун Хорватия футбол оиласи учун оғир дамлардир”, — дея қўшимча қилди ХФФ президенти Марижан Кустич.
Маълумот ўрнида, Покривач профессионал фаолияти давомида бир қанча футбол клубларида тўп сурган. У жами 353 та ўйинда майдонга тушиб, 30 та гол уришга эришган.