Европа Иттифоқи Фаластин учун 1,6 млрд евро ажратади
Пулнинг асосий қисми Фаластин маъмуриятини қўллаб-қувватлашга ва Ғарбий Соҳил ҳамда Ғазо секторининг тикланишига йўналтирилади.
Европа Иттифоқи Фаластин учун 1,6 миллиард евролик молиявий ёрдам пакетини эълон қилиши кутилмоқда.
Бу маблағнинг асосий қисми Фаластин маъмуриятини қўллаб-қувватлашга ва Ғарбий Соҳил ҳамда Ғазо секторининг тикланишига йўналтирилади. Бироқ, Ғазодаги давом этаётган уруш туфайли маблағнинг қанча қисми ҳақиқатан ҳам фаластинликларга етиб бориши ҳозирча номаълум.
Европа Иттифоқининг Ўрта ер денгизи бўйича комиссари Дубравка Шуица Financial Times нашрига берган интервьюсида, бу ёрдам пакетининг 1,2 миллиард евроси ёрдам сифатида, 400 миллион евроси эса Европа Инвестиция банки ва Европа Барқарор Тараққиёт Жамғармаси орқали кредитлар кўринишида ажратилишини маълум қилди.
Шуицанинг айтишича, 620 миллион евро Фаластин маъмурияти учун тўғридан-тўғри молиявий ёрдам сифатида, яна 576 миллион евро эса Ғарбий Соҳил ва Ғазо секторининг барқарорлиги ва тикланишига ажратилади.
Ушбу маблағлар қатор шартлар билан бирга тақдим этилади. Шуица: “Бу ёрдамлар ислоҳотлар ва мақсадли натижалар билан боғлиқ, чунки биз уларнинг кучли, ишончли ва ислоҳотга тайёр бўлишини истаймиз. Бизнинг асосий мақсадимиз — Ғарбий Соҳил ва Ғазода демократик ва шаффоф бошқарувга эришиш,” — дея қўшимча қилди у.
Аммо бу шартлар ҳозирги реал вазият билан тўқнаш келмоқда. Ғазода Исроил ҳужумларни кучайтирган — яқинда шаҳардаги асосий фаол шифохоналардан бири нишонга олинган. 2,2 миллион аҳолига эга Ғазо секторида озиқ-овқат, ёқилғи, дори-дармон ва гуманитар ёрдамлар кириши тўхтатилган.
Европарламент илгари Фаластин маъмурияти томонидан тарқатилган дарсликларда нафратга чорловчи контент аниқлангани сабабли ёрдам маблағлари устидан кўпроқ назорат ўрнатилиши лозимлигини талаб қилган эди.
Баъзи ЕИ аъзолари маблағларни зудлик билан ажратиш керак, деб ҳисобламоқда, чунки Фаластин маъмурияти ходимлари бир неча ойдан буён маош олмаган. Шуица бу ҳолатни тан олди:
“Мен биламан, ҳаммаси сиёсий ирода билан боғлиқ. Бу эса Исроилнинг ҳаракатларига тааллуқли. Лекин Европа томошабин бўлиб турмаслиги керак. Бизнинг якуний мақсадимиз ўт очишни тўхтатишга эришишдир. Ҳозирча бу амалга ошмаган бўлса-да, музокаралар учун имконият бор, деб ўйлаймиз.”