Кўзни зарарловчи юқумли вирусли конюнктивит
Кўзда шамоллаш ёки қизариш кузатилса, тезда кўз шифокорига мурожаат қилиш керак. Бу касалликни уй шароитида даволаб бўлмайди, бунга уринманг ҳам.
Ҳозирги кунда кўпчиликнинг кўзида вирусли конюнктивитлар кўп учрамоқда. Офталмолог Ҳикматулло Содиқовнинг айтишича, касалликдан шикоят қилиб келувчилар сони кўпайган.
“Биз ҳар куни вирусли конюнктивитга дуч келяпмиз. Аваллари камроқ эди. Масалан, қайсидир фаслда учраган бўлса, ҳозирга келиб одатий ҳолга айланиб қолди. Бу, албатта, коронавирус пандемияси, грипп ва бошқа вирусли касалликлар билан боғлиқ.
Иммунитет сусайганидан кейин кўзга вирус тушади. Бу томоқ ва бурундаги шамоллаш, грипп ва бошқа ўткир респиратор касалликлар орқали кўзга ўтади. Оқибатда кўзда қизариш, ёшланиш ва йиринглаш кузатилади. Бора-бора кўзда хиралик келиб чиқади”, деди мутахассис.
Унинг айтишича, агар бу касаллик вақтида даволанмаса, кўз ойнасида майда-майда доғлар пайдо қилади.
“Доғлар кўпайиб кўзни оқартиради, хиралашишга ва туман пайдо бўлишига олиб келади. Шунинг учун кўзда шамоллаш ёки қизариш кузатилса, тезда кўз шифокорига мурожаат қилиш керак. Бу касалликни уй шароитида даволаб бўлмайди, бунга уринманг ҳам.
Вирусли конюнктивит кўз ичининг шиллиқ қаватида плёнка пайдо қилади. Даволаш вақтида бу плёнкани олиб ташлаб, махсус дорилар қиламиз. Шифокор назоратида даволанмаса, вирус кўзда бир умрлик ёмон асорат қолдириши мумкин”, деди офталмолог.
Ҳикматулло Содиқовнинг алоҳида таъкидлашича касаллик юқумли, атрофдагиларга жуда тез юқади. Шунинг учун вирусли конюнктивит билан оғриган беморлар ўқиш ёки ишидан маълум бир муддатга чекланади.
Юқоридаги видеода батафсил маълумот олиш мумкин.
