Leapmotor можароси: тақиқлар қонунийми?
Техник тартибга солиш инспекцияси ушбу русумдаги машина импортини тақиқлаган, ижтимоий тармоқларда кенг муҳокамалар бошланган. Аслида вазият қандай?
Бугун Техник жиҳатдан тартибга солиш агентлиги Leapmotor C16 автомобилида аниқланган “камчилик” сабабли автомобилларларни сертификатлаштириш органларига Leapmotor русумли машиналарни сертификатлаштириш юзасидан аризаларни қабул қилишни тўхтатиш тўғрисида хат юборган.
.jpg)
Ижтимоий тармоқ фаоллари ва жамоатчилик орасида ушбу ҳолат танқидий қабул қилиниб, кўплаб мунозараларга сабаб бўлган. Мустақил иқтисодчи-блогер Отабек Бакиров эса буни буюртма деб атаган.
"Чайқовчи монополистнинг қимматлаштирилган Лузер лақабли мошини сотилмаётгани учун Leapmotor’ни жазолашга буюртма-ҳаракат бошлангани ва бунга баҳона қидирилаётгани анчадан бери айтилаётганди", деб ёзган блогер.
Шу сабабли инспекция муносабат ҳам берган. Унда айтилишича, Хитойнинг Leapmotor компаниясига тегишли C16 русумли автомобил синовдан ўтказилганда халқаро стандартларга, хусусан, Бирлашган Миллатлар Ташкилоти томонидан белгиланган хавфсизлик талабларига жавоб бермаслиги аниқланган, яъни белгиланган меъёрдан 16 баравар кўп.
Инспекциянинг эслатишича, электромагнит мослашувчанлик (ЭМС) – электрон қурилмалар ва тизимлар ўртасида электромагнит майдонлар таъсирини минималлаштириш учун ўтказиладиган муҳим синовдир. Бундай синовлар транспорт воситалари учун ҳам зарур, чунки электромагнит майдонларнинг автомобил электрон тизимларига таъсири хавфсизликка жиддий таъсир қилиши мумкин.
Бундан ташқари, электромагнит нурланишнинг инсон саломатлигига таъсири ҳам муҳим масала ҳисобланади. Тадқиқотларга кўра, юқори даражадаги электромагнит майдонлар организмга салбий таъсир кўрсатиши, жумладан, асаб тизими, юрак-қон томир тизими ва ҳатто саратон касалликлари хавфини ошириши мумкин.
Қайд этиш керак, Ўзбекистонда электромагнит мослашувчанлик (ЭМС) синовлари Ўзбекистон илмий-синов ва сифат назорати марказининг Пискент туманида жойлашган махсус лабораториясида ўтказилади.
Жамоатчилик томонидан ушбу лаборатория ягоналиги учун навбатлар ҳаддан зиёд кўплиги, аҳоли сарсон бўлаётганига анчадан бери эътибор қаратилиб, кўп танқидий чиқишлар кузатилган.
