Сартарошлар, репититор, гидлар ва бошқалар ўзини ўзи банд қилувчилар рўйхатидан чиқарилмоқда
Эндиликда деҳқон бозорларида қишлоқ хўжалигини сотувчилар ҳам якка тартибдаги тадбиркор сифатида рўйхатдан ўтиши керак.
Эндиликда сартарошлик, репититорлик, фото ва видео хизматлари кўрсатиш ўзини ўзи банд қилишга кирмайди.
Президентнинг “Кичик ва ўрта бизнеснинг иқтисодиётдаги ўрнини ошириш чора-тадбирлари тўғрисида”ги фармони эълон қилинди.
Унга кўра ўзини ўзи банд қилган шахслар шуғулланиши мумкин бўлган фаолият турлари, ишлар ва хизматларнинг янги рўйхати тасдиқланди. Мазкур рўйхатга ҳозирда 104 та банд киритилган бўлса, 2026 йил 1 январдан бошлаб у 72 тага қисқаради. Сартарошлик, репетиторлик, фото-видеочилик, копирайтерлик, уйда эшик ва деразалар ясаш, гулчилик, газета ва журналлар сотиш, деҳқон бозорларида қишлоқ хўжалиги маҳсулотлари билан савдо қилиш ва бошқалар (тўлиқ иловада) рўйхатдан чиқариб ташланади. Ушбу касблар вакиллари якка тартибдаги тадбиркор ёки юридик шахс сифатида рўйхатдан ўтишлари керак.
Янги рўйхатга электрон савдо майдончаларида (маркетплейсларда) товар ва хизматларнинг чакана савдоси, шунингдек, номоддий маданий мерос объектларини муҳофаза қилиш ва улардан фойдаланиш ҳамда паррандачилик ҳам киритилган.
Фармонга кўра, 2025 йилда кичик ва ўрта бизнесни ривожлантиришнинг асосий мақсадли кўрсаткичлари этиб қуйидагилар белгиланди, жумладан:
-кичик ва ўрта бизнеснинг ялпи ички маҳсулотдаги улушини 55 фоизга, саноатда – 34 фоизга, экспортда – 34 фоизга ва аҳоли бандлигини таъминлашда 75 – фоизга етказиш;
-камида 600 нафар кичик ва ўрта бизнес субъектларининг йириклашишига кўмаклашиш орқали уларни “чемпион” тадбиркорларга айлантириш;
-100 нафардан кўп ишчиси бор тадбиркорлик субъектлари сонини 4 мингга етказиш.
2025 йил 1 майдан:
-ўзини ўзи банд қилган шахслар ЯТТ ёки юридик шахс сифатида давлат рўйхатидан ўтказилганда, давлат божи ундирилмайди;
-ўз фаолиятини тегишинча ЯТТ, микрофирма ёки кичик корхона тоифасигача йириклаштирган ўзини ўзи банд қилган шахслар ва тадбиркорларга Оилавий тадбиркорликни ривожлантириш дастури доирасида 50 миллион сўмгача, Кичик бизнесни узлуксиз қўллаб-қувватлаш комплекс дастури доирасида – 150 миллион сўмгача гаровсиз кредитлар берилади;
-ўз фаолиятини тегишинча ўрта ёки йирик бизнес тоифасигача йириклаштирган тадбиркорларга – 1 йил давомида ҚҚС суммаси ўрнини қоплаш (қайтариш) 7 кун муддатда тезлаштирилган тартибда амалга оширилади.
