Ўзини ўзи иситувчи хонадонлар ҳам марказлашган иссиқлик таъминотига уланади
Иссиқлик таъминоти хизматлари учун пасайтирилган тарифларни 2030 йилгача таннарх даражасига етказиш кўзда тутилмоқда.
Бир ёки икки контурли қозонлар билан истилувчи хонадонлар ҳам марказлашган тизимга уланади.
“Уй-жой ҳамда бино-иншоотларни иссиқлик энергияси билан таъминлаш соҳасини тубдан ислоҳ қилиш ҳамда биноларнинг энергия самарадорлигини ошириш чора-тадбирлари тўғрисида”ги Президент қарори (ПҚ-100-сон, 11.03.20225 й.) қабул қилинди.
Унда уй-жой ва бино-иншоотларни иссиқлик энергияси билан барқарор таъминлаш ҳамда биноларнинг энергия самарадорлигини оширишнинг келгуси 5 йилдаги асосий йўналишлари этиб қуйидагилар белгиланди. Жумладан, марказлашган иссиқлик таъминотига уланмаган тўрт ва ундан юқори қаватли кўп квартирали уй-жойларнинг иситиш тизимида локал қозонхоналар қуриш мўлжалланмоқда.
Шу ва бошқа муқобил технологияларни жорий этиш ҳисобига бир хонадоннинг газга бўлган талабини камида 20 фоизга камайтириш кўзда тутилмоқда, дейилади қарорда.
Иссиқлик тизимини реконструкция қилиш учун халқаро молия институтларидан 257 миллион доллар жалб этилади.
Қарорда Жаҳон банкининг Халқаро тараққиёт жамғармасидан 143 миллион доллар қарз ўзлаштириш ҳам айтиб ўтилган.
"Иссиқлик таъминоти хизматлари учун пасайтирилган тарифларни 2030 йилгача таннарх даражасига етказиш кўзда тутилмоқда. Тасаввур қилишингиз учун, 2024 йил сентябрь ҳолатига Тошкент шаҳрида таннархга етиши учун тарифлар камида 5,5 карра ошиши керак", дея ёзади иқтисодчи Отабек Бакиров.
