"Қамчиқ" довонида минглаб одамлар қорда қолиб кетди
Улар учун Ангрен - Қўқон йўналишида вақтинча бепул поезд ҳаракати йўлга қўйилди.
Бугун эрталабдан ёққан кучли қор туфайли "Қамчиқ" довони ёпилди, минглаб одамлар қорда қолиб кетди.
Фавқулодда вазиятлар вазирлиги ходимлари ноқулай аҳволга тушиб қолган ҳайдовчиларга ёрдам кўрсатмоқда. Йўловчилар учун ФВВ томонидан исиниш масканлари ташкил этилган.
Фавқулодда вазиятлар вазирининг биринчи ўринбосари жараённи мувофиқлаштириб бораётгани айтилган. Шунингдек, Ангрен шаҳрида жойлашган 19 та ошхона, 4 та меҳмонхонага 790 нафар эркак, 130 нафар аёл ва 38 нафар болалар вақтинча жойлаштирилган.
Айни вақтда "Қамчиқ" довонида қор ёғишда давом этмоқда. ФВВ, ЙПХ ва "Қамчиқавтойўл" ИЙФУК ходимлари ҳамкорлигида йўлни қордан тозалаш, музламалар ҳосил бўлишининг олдини олиш ва қум-туз аралашмасини сепиш ишлари олиб борилмоқда.
Шунингдек, ФВВ қутқарувчилари томонидан назорат тадбирлари олиб борилиб, йўлда қолиб кетган ҳайдовчи ва уларнинг автотранспорт воситаларига ёрдам кўрсатилмоқда.
Қорда қолиб кетган одамлар учун Ангрен - Қўқон йўналишида вақтинча бепул поезд ҳаракати ҳам йўлга қўйилди.
