ЙҲХ бўйича қоғозбозлик йўқолгани айтилди
Бироқ давлат раҳбарининг топшириқлари қуйи бўғинларда бажарилмай қолиб кетмоқда.
Йўл ҳаракати хавфсизлиги инспекторлари боди-камера билан хизмат ўтаётгани, авторақамлар аукционда сотилаётгани, “қўл радари” ва қоғоз баённома тузиш бекор қилингани учун коррупция омиллари кескин камайди, дейилди президент бошчилигидаги йиғилишда.
Қайд этилишича, аҳоли ва тадбиркорларга “халқ хизматидаги давлат” тамойили асосида хизмат кўрсатиш йўлга қўйилиб, 120 турдаги ҳужжатларни талаб қилиш, 160 дан ортиқ лицензия ва рухсатномалар бекор қилинган.
Натижада 200 мингга яқин янги тадбиркорлар бозорга кириб келди. Чет эл иштирокидаги корхоналар қарийб 5 карра ошиб, 23 мингга яқинлашди. Электрон давлат хизматлари сони 15 карра ортиб, 721 тага етди, улардан фойдаланувчилар эса 11 миллиондан ошди.
“Олдинги 25 йил давомида бу тушунчалар бизга ёт эди. Кўриб кўрмасликка олинарди. Буларни ҳеч бири ўзидан-ўзи бўлгани йўқ. Ҳаммасига машаққатли меҳнатимиз билан эришдик. Энг муҳими – буларнинг ҳисобига аҳоли, тадбиркорлар, хорижий ҳамкорларимиз, халқаро ташкилотлар ва инвесторларнинг ислоҳотларимизга ишончи мустаҳкамланди", деди Шавкат Мирзиёев.
Бироқ давлат раҳбарининг топшириқлари қуйи бўғинларда бажарилмай қолиб кетаётгани учраб турибди. Масалан, яқинда Platina.uz айнан шундай ҳолатни ўрганиб, ёритганди.
Яъни амалда талаб қилиш бекор бўлиб кетган ҳужжатни аввалига ЙҲХ ходимлари талаб қилган, кейин эса буни Давлат хизматлари маркази пулга сотган эди.
Ҳолат юзасидан бирор ташкилот муносабат билдиргани йўқ. Platina.uz Адлия вазирлиги ва ДХМ матбуот хизматлари билан боғланган, аммо ҳалигача жавоб олмади.
ЙҲХХ ахборот хизмати раҳбари эса хизмат текшируви тайинлаши мумкинлигини айтган, лекин бу ҳам гаплигича қолиб кетди.
