Қирғизистон президенти "Дин тўғрисида"ги қонунни имзолади

Қирғизистон президенти Садир Жапаров “Дин тўғрисида”ги қонунни имзолади ва бунинг сабабини тушунтирди. У ўз баёнотини ижтимоий тармоқдаги саҳифасида эълон қилди.

Давлат раҳбари диний меъёрлар тарафдорлари ундан қонунни рад этишни сўраганини таъкидлади.

“Шу билан бирга, қонуннинг имзоланиши ва кучга киришини талаб қилган дунёвий қарашдаги фуқаролар ҳам бор. Шуни унутмаслигимиз керакки, бизнинг мамлакатимизда диний эътиқодлилар қанча бўлса, иккинчиси ҳам шунчалик кўп. Дунёвий кишилар нотанишларнинг квартиралар ва уйларни айланиб чиқишларига ва эшикларни тақиллатишига қарши. Одамлар бу сайёр даъватчилар кимлар, уларнинг муфтийлик, қозиёт ёки хатибият томонидан берилган гувоҳномалари борми, улар қайси ташкилот ёки йўналишни тарғиб қилмоқда, бу динимизга зидми, деган саволларга жавоб олишни истайди”, деб ёзади у.

Садир Жапаров қонунда биргина мунозарали нуқта бор – уйма-уй юриб маъруза ўтказиш масаласи борлигини таъкидлади.

“Мамлакатимизда ҳалигача уйларни айланиб чиқиш масаласи тўғри йўлга қўйилмаган. Бундай турларга ким рухсат бериши, уларда кимлар иштирок этиши, қандай маълумот талаб қилиниши, ким даъват ўтказиш ҳуқуқига эга, қандай варақалар ёки китоблар тарқатилишига рухсат берилгани ва бу материалларни ким текшириши аниқланмаган”, — деди у.

"Фуқароларимиз ўз оиласи, фарзандларини қаровсиз, озиқ-овқатсиз қолдириб, уч кун, 40 кун, ҳатто тўрт ойга кетиб қолиш ҳолатлари ҳам учраб турибди. Бу қандай мумкин? Аввал оилани ҳеч бўлмаганда минимал озиқ-овқат билан таъминлаб, кейин бориб динга даъват қилиб бўлмайдими?", дейди Жапаров.

“Ҳеч ким диний даъватга қарши эмас. Биз ҳеч қачон тўғри даъватдан азоб чекмаймиз. Ҳозирча уни масжидларда, тўйларда, жанозаларда, бозорларда ёки одамлар тўпланадиган бошқа жойларда ўтказиш мумкин”, — деди у.

Президент муфтийлик ва Уламолар кенгаши маърузаларда кимлар иштирок этиши, қайси орган гувоҳнома бериши, назоратни ким амалга ошириши юзасидан аниқ талаб ва қоидалар белгилаб, давлат раҳбарига таклиф этиши кераклигини таъкидлади.

“Биз кўриб чиқамиз ва қўллаб-қувватлаймиз. Бу билан ҳеч қандай муаммо йўқ. Масалан, мен ҳеч қачон динга қарши чиқмайман. Мен умри давомида художўй ва диндор бўлган одамнинг ўғлиман. Мен дин нималигини жуда яхши тушунаман. Агар мен ҳозир “Мен фақат динга қатъий амал қилганларнинг хайрихоҳлигини сақлаб қолмоқчиман ва келажакда нима бўлиши муҳим эмас”, деб ўйласам, бу қонун лойиҳасини шунчаки эътироз билан қайтаришим мумкин эди. Лекин мен бу масалага оддий фуқаро сифатида эмас, балки мамлакат президенти сифатида қарайман”, деб ёзади у.

Жапаровга кўра, Қирғизистонда диний эътиқод 33 йўналишга бўлиниб кетган. Улар орасида тақиқланган ташкилотлар илгари сурадиган ғоялар ҳам бор.