Хоразмда эҳтиёжманд кишиларга Президент совғаси топширилди

Бундан ташқари ногиронлиги бор 33 талабанинг контракти тўлаб берилди,  170 мурожаатчи доимий иш билан таъминланди. 

Жамият
4 апрель, 13:53
Хоразмда эҳтиёжманд кишиларга Президент совғаси топширилди

Муборак Рамазон ойида эҳтиёжманд оилаларга Президент совғалари топширилди. 

Давлат раҳбари баҳорнинг илк кунларида Хоразм вилоятига ташрифи чоғида вилоятда ишсизликни камайтириш, тадбиркорларни қўллаб-қувватлаш орқали янги иш ўринлари яратиш бўйича аниқ муддатли топшириқ берган эди. Президент Халқ қабулхонаси айни шу топшириқ ижроси бўйича ўзига бириктирилган Шовот ва Ҳазорасп туманларида иш олиб борди.

Жумладан, Президент виртуал қабулхонасига моддий ёрдам масаласида арз қилган, оғир ижтимоий аҳволдаги қарийб 170 нафар мурожаатчига ишлаб даромад топиши учун Президент Халқ қабулхонаси ҳисобидан қисқа муддатда тикув машиналари олиб берилди. Муборак Рамазон ойида Президент совғаси сифатида туҳфа этилган бу иш анжомлари оилаларнинг рўзғорини бутлаши учун яна бир янги имконият бўлди. Ўз тикув машинасига эга бўлган аёллар энди ишлаб чиқариш ва оилавий корхоналарда кооперация асосида иш бошлади.

Тадбиркорларнинг муаммоларини ўрганиш, уларга тезкор ва самарали ечим топиш мақсадида Президент Халқ қабулхонаси раҳбари Улуғбек Муҳаммадиев бошчилигидаги гуруҳ туманларда ўрганишлар олиб борди.

Хусусан, Шовотнинг “Шовот” маҳалласидаги ҳунарманд Садоқат Матпанаева корхонаси фаолияти ўрганилди. Ҳозирги кунда корхона 10 турдаги қуроқлар тайёрлаб, Қозоғистонга экспорт қиляпти. Буюртмалари кундан кун ошаётган Садоқат Матпанаева ҳам бугун яна 6 нафар қуроқчини ишга қабул қилди. Умуман, Президент Халқ қабулхонаси ҳисобидан бир ойда Шовотда 60 нафардан зиёд ишсиз аёлларга тикув машиналари олиб берилиб, улар бандлигини таъминлаш учун ўндан ортиқ маҳаллада кооперациялар ишга туширилди.

Худди шундай Ҳазораспдаги “Hazorasp Diomond” корхонасига Президент Халқ қабулхонаси тавсияси билан бириктирилган 20 нафар тикувчи Россияга экспорт қилиш учун кийим-кечаклар тайёрлашга киришган бўлса, яна 30 нафар тикувчи “Ҳазорасп нурли замин” оилавий корхонасида кўрпа, ёстиқ, келинлар учун сарполар ишлаб чиқаришга ҳисса қўша бошлади.

Бундан ташқари, Президент Халқ қабулхонаси ҳисобидан бир қатор ёшларга мотокультиваторлар ва бошқа иш анжомлари олиб берилди. Дейлик, шовотлик 2-гуруҳ ногирони Бекпўлат Эшжоновга ҳам этикдўзлик ускуналари совға қилингач, натижа уч кундаёқ билинди. У ўз кичик тадбиркорлиги бошлади.

Шунингдек, бу жараёнда оғир хасталикка чалинган 39 нафар мурожаатчининг дори-дармон ва даволаниш харажатлари қопланган бўлса, шовотлик Муқаддас Сотимова каби ижтимоий ҳимояга муҳтож, ногиронлиги бор 33 нафар талабанинг контракт тўлови тўлаб берилди.

Бир сўз билан айтганда, Президент Халқ қабулхонасининг Ҳазорасп ва Шовот туманларидаги фаолияти давомида ижтимоий ҳимояга муҳтож 274 нафар мурожаатчининг энг бирламчи ҳаётий муаммолари ҳал қилинди, шундан қарийб 170 нафар мурожаатчи доимий иш билан таъминланди.

Халқ билан мулоқотнинг мазкур янги механизми энди Янгибозор ва Тупроққалъа туманларида амалга оширилади.

 

 

© 2023 Platina.uz. Барча ҳуқуқлар ҳимояланган. «Platina.uz» сайтида жойланган маълумотлар муаллифнинг шахсий фикри. Сайтда жойланган ҳар қандай материаллардан ёзма рухсатсиз фойдаланиш тақиқланади.
Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги томонидан 02.12.2022 санасида №051412 сонли гувоҳнома билан ОАВ сифатида рўйхатга олинган.
Platina.uz сайтида реклама жойлаштириш масаласида +998 97 022 01 10 телефон рақамига (Telegram: Platina PR) мурожаат қилинг. Таҳририят билан алоқа: info@platina.uz
18+