Татаристонга илк бор Украина дронлари ҳужум қилди
Ўтган йили АҚШ нашрлари Россия Эрон билан ҳамкорликда Татаристонда дрон заводи қуришни режа қилгани ҳақида ёзганди.
Дронлар Татаристон республикасидаги Елабуга ва Нижнекамскдаги корхоналарга ҳужум қилди, бир неча киши жароҳатланди, бироқ жиддий зарар йўқ, деб ёзади "ТАСС" республика раҳбари матбуот хизматига таяниб.
Технологик жараён бузилмаган, деб ёзади "РИА Новости" расмийлар баёнотига асосланиб.
Бу уруш бошлангандан буён украин дронларининг Татаристон ҳудудига илк ҳужуми саналади. Украина чегарасидан Татаристонгач қарийб 1,2 минг километрни ташкил этади.
Март ойида Украина Қуролли кучлари Россия нефтни қайта ишлаш заводларига, шунингдек, бошқа саноат объектларига учувчисиз самолётлар билан ҳужумлар сонини оширган.
Ўтган йили Washington Post газетаси Россия Елабугадаги заводда Эрон моделидаги дронларни ишлаб чиқаришни йўлга қўймоқчилиги ҳақида хабар берган эди.
2023 йилнинг февралида Wall Street Journal газетаси АҚШ иттифоқчиларидан бирининг номи ошкор этилмаган расмийларига таяниб, Москва ва Теҳрон Россияда Украинадаги уруш учун камида 6 мингта учувчисиз учоқларни ишлаб чиқарадиган янги завод қуриш режаларини ишлаб чиқаётгани ҳақида хабар берди.
