Apple смартфон савдосида Samsung`дан ортда қолди

International Data Corporation тадқиқот компанияси ҳисоботига кўра, 2024 йилнинг январь-март ойларида Apple смартфонлари савдоси ўтган йилнинг шу даврига нисбатан 9,6 фоизга камайди. Бу даврда 50,1 миллион дона iPhone сотилган (2023 йилнинг биринчи чорагида 55,4 миллион дона), компаниянинг бозордаги улуши 17,3 фоизни ташкил қилган.

Apple компаниясининг кўрсаткичи Bloombergнинг компания ўртача 51,7 миллион смартфон етказиб беришини билдирган прогнозидан ҳам ёмонроқ бўлиб чиқди. Компаниянинг фаолияти Хитойда сотувлар пасайиши туфайли ёмонлашди (Counterpoint Research таҳлилчиларининг фикрига кўра, улар йил бошида 24 фоизга пасайган). 2023 йилда бу мамлакат расмийлари миллий хавфсизликка хавф туғдиришини баҳона қилиб, айрим давлат хизматчиларига иш жойида iPhone ва бошқа хорижий қурилмалардан фойдаланишни тақиқлаган эди.

Apple энг йирик смартфон ишлаб чиқарувчилари рейтингида Samsung`га яна биринчи ўринни бой берди. Жанубий Корея компаниясининг сотуви 60,1 миллион дона қурилмани ташкил этиб, 0,7 фоизга, бозор улуши 20,8 фоизга пасайди (2023 йил охирида Apple Samsung компаниясини ортда қолдирди: савдо ҳажми мос равишда 234,6 миллион ва 226,6 миллион телефонни ташкил этди).

2024 йилнинг биринчи чорагида учинчи ўринни Хиаоми эгаллади, у 40,8 миллион дона смартфон етказиб берди ва бозорнинг 14,1 фоизини эгаллади. Биринчи бешликка Transsion (28,5 миллион смартфон, 9,9 фоиз) ва Oppo (25,2 миллион, 8,7 фоиз) ҳам кирди. Transsion сотуви 85 фоизга, Xiaomi эса 33,8 фоизга ошди.

Йилнинг дастлабки уч ойида жами 289,4 миллион дона смартфон сотилган, бу ўтган йилга нисбатан 7,8 фоизга кўпдир.