Путин Россияга миллионлаб ишчилар етишмаётганини айтди

Россия президенти Владимир Путин мамлакат меҳнат бозоридаги оғир етишмовчилик ҳақида гапирди. 

Путин Стратегик ташаббуслар агентлигининг “Янги замонлар учун кучли ғоялар” форумида Россия меҳнат бозорида тахминан 2,5 миллион киши етишмаслигини айтди. Бу ҳақда “ТАСС” хабар бермоқда.

РФ президентининг сўзларига кўра, мамлакатда ишсизлар сони 450-460 минг кишига етади.

“Меҳнат бозорида ишчи кучларига эҳтиёж бор, 2,5 миллион киши етишмаяпти. Бу бизнинг бизнесимиз ҳозир таклиф қилишга тайёр бўлган ўринлардир”, — деди Путин.

Мисол тариқасида у ҳозирда юз минглаб одамларни қабул қилишга тайёр бўлган қурилиш сектори ва саноатни келтирди.

Аввалроқ Россияда марказий осиёлик мигрантлар камайгани хабар берилганди. Унга кўра, муҳожирлар Европа ва араб давлатларини маъқул кўрмоқда. 

Шунингдек, Россия аҳолиси ҳам камайишда давом этмоқда. 2024 йил 1 январ ҳолатига кўра, аҳоли сони 146 млн. 203,6  минг кишини ташкил этди. Бу кўрсаткич бир йил аввал  146 млн. 447,4 минг киши эди.