Грузия бош вазири мамлакат президентига қамоқ билан таҳдид қилди

Грузия президенти Саломе Зурабишвили ўз меросхўрини ноқонуний деб ҳисоблагани учун лавозимини тарк этишдан бош тортмоқда. Бош вазир Кобахидзе эса уни жиноий жавобгарликка тортиш билан таҳдид қилмоқда.

Грузия бош вазири Ираклий Кобахидзе Саломе Зурабишвили мамлакат президенти лавозимини тарк этишдан бош тортса, қамоққа тушиши мумкинлигини айтди. Ҳукумат раҳбари бу сўзларни 22 декабр куни гапирган.

"29 куни у истеъфога чиқишига тўғри келади, кўрамиз, у ўз ҳаётини қаерда давом эттиради: панжара ортидами ёки озодликда, менимча, у жиноий кодекс меъёрларини бузмаслик учун етарли даражада эҳтиёткор бўлади", деб Кобахидзедан иқтибос келтиради Грузия Биринчи канали.

“Яна бир бор такрор айтаман: ҳеч ким 72 ёшли аёлни қамоққа ташламоқчи эмас, лекин у бу сценарийда президент қароргоҳида ўзи билан бирга бўладиган барчани хавф остида қолдиради”, — дея қўшимча қилди бош вазир.

Эслатиб ўтамиз, Грузияда сайлов коллегияси Михаил Кавелашвилини мамлакат президенти сифатида сайлаганди. Мухолифат сайловларда қатнашмади.

Саломе Зурабишвили эса натижаларни тан олмай, ваколатини топширишдан бош тортмоқда. Бу эса мамлакатда навбатдаги сиёсий инқирозга сабаб бўлиши мумкин.

Бундан ташқари Зурабишвили мухолифат намойишларида қатнашиб, уни фаол қўллаб-қувватламоқда.