Грузия президенти истеъфо беришдан бош тортди

Саломе Зурабишвили Грузия президенти лавозимини тарк этишдан бош тортди.

У 29 декабр куни президентлик муддати тугаганидан кейин мандатини топширишдан бош тортди ва Европа Иттифоқини мухолифат намойишларини қўллаб-қувватлашга чақирди.

Зурабишвилининг қўшимча қилишича, у энди ҳукмрон "Грузия орзуси" партияси билан алоқаларни узган.

14 декабр куни Грузияда янги тизим бўйича илк президентлик сайловлари бўлиб ўтди. Давлат раҳбарини мамлакат фуқаролари эмас, балки 300 нафар вакилдан иборат сайлов коллегияси: парламент депутатлари, автоном республикалар ва маҳаллий маслаҳат органлари сайлади.

Сайловда ҳукмрон "Грузия орзуси" партиясидан ягона номзод Михаил Кавелашвили ғолиб чиқди. Бироқ Зурабишвили овоз бериш жараёнини танқид қилиб, "ҳеч ким ҳеч кимни сайламаганини" ва сайловларни ноқонуний деб атади.

Шунингдек, у натижаларни қабул қилишдан бош тортганларга миннатдорчилик билдирди.

Грузияда ноябр ойи охирида бошланган норозилик намойишлари ҳамон давом этмоқда. Биринчи бор унга республика Бош вазири Ираклий Кобахидзенинг мамлакатнинг Европа Иттифоқига аъзолиги бўйича музокараларни 2028 йилгача тўхтатиб туриш ҳақидаги баёноти бўлди. Мухолифат партиялари тарафдорлари кўчаларга чиқиб, полиция ходимлари билан тўқнашди.