ОАВ: Асадлар оиласининг бойлиги 12 млрд доллардан ошади

Сурия собиқ президенти Башар Асад оиласининг активлари қиймати 12 миллиард долларга етиши мумкин, деб ёзади Wall Street Journal.

2021 йилда бутун Суриянинг ялпи ички маҳсулоти (ЯИМ) атиги 8,98 миллиард долларни (8,54 миллиард евро) ташкил этганига қарамай, Башар Асад оиласининг активлари қиймати 12 миллиард долларга (11,4 миллиард евро) етиши мумкин. Бу ҳақда Американинг The Wall Street Journal газетаси 15 декабр куни хабар берди.

Асад режимининг қулаши билан Сурияда 50 йилдан ортиқ вақт давомида ҳокимият тепасида турган унинг оиласининг кўп миллиард долларлик бойлиги учун глобал ов бошланди, деб ёзади нашр.

"Инқилобдан олдин уларнинг пулларни ювиш учун кўп вақтлари бор эди, уларда ҳар доим "Б" режа бўлган ва қувғинга яхши тайёргарлик кўришган", дейди Оқ Уйда Сурия сиёсати учун масъул бўлган Эндрю Таблер.

Таблер Вашингтон Яқин Шарқ сиёсати институти ходими саналади. Илгари у Асад оиласи аъзоларига нисбатан санкциялар қўллаш учун уларнинг мол-мулкини аниқлаш устида ишлаган.

Башар Асад ва унинг отаси Ҳофиз қариндошлари ёрдамида бойликларини хорижда яширган, дея таъкидлайди WSJ.

Асадлар клани бойлигининг аниқ ҳажми ва қайси оила аъзолари қайси активларни назорат қилиши номаълум. Башар Асаднинг қариндошлари томонидан йиллар давомида амалга оширилган халқаро харидлар орасида: Россия Федерациясидаги ҳашаматли кўчмас мулк, Венадаги меҳмонхоналар ва Дубайдаги шахсий самолёт бор.

2013 йилдан 2019 йилгача собиқ президентнинг қариндошлари Москва шаҳридан қиймати 40 миллион доллар (38 миллион евро) бўлган камида 20 та ҳашаматли квартира сотиб олишган, деб ёзади Financial Times.

АҚШ Давлат департаментининг 2022 йилдан бошлаб ҳисоб-китобларига кўра, Асадлар билан боғлиқ корхоналар ва активларнинг қиймати 1 дан 12 миллиард долларгача (950 минг евродан 11,4 миллиард еврогача) бўлиши мумкин.

Ушбу маблағлар кўпинча давлат монополиялари ва гиёҳванд моддалар савдоси, хусусан, Captagon савдо белгиси остида амфетамин бирикмаси орқали олинган ва кейинчалик қисман халқаро ҳуқуққа эга бўлмаган юрисдикцияларга қайта инвестиция қилинган, дея таъкидлайди WSJ.