Собиқ футболчи Грузия президенти этиб сайланди

Сайлов коллегияси Михаил Кавелашвилини Грузия президенти этиб сайлади.

53 ёшли собиқ футболчи, "Халқ ҳокимияти" партияси аъзоси, ҳукмрон "Грузия орзуси" партияси томонидан номзод сифатида кўрсатилди. У сайловда давлат раҳбари лавозимига ягона даъвогар бўлган ва биринчи турда ғалаба қозонганди.

Ҳукмрон партия асосчиси ва фахрий раиси Бидзина Иванишвили Кавелашвилини шундай таърифлади: "У грузин кишисининг энг яхши тимсолидир".

26 октябрда бўлиб ўтган парламент сайловлари натижаларини тан олмаган мухолифат номзодини кўрсатмади ва сайловда қатнашмади.

Грузиянинг амалдаги президенти Саломе Зурабишвили мазкур воқеаларга қандай муносабатда экани ҳозирча номаълум.

Эслатиб ўтамиз, Грузияда парламент сайлови натижалари эълон қилингандан буён намойишлар тинмаяпти.