БМТ Исроилдан босиб олинган Фаластин ҳудудларини тарк этишга чақирди
Ўзбекистон ҳам Фаластинни қўллаб-қувватлади. Ҳужжатни 124 давлат маъқуллаган, 14 давлат қарши овоз берди, улар ичида АҚШ, Чехия каби давлатлар бор.
БМТга аъзо давлатлар 18 сентябр куни Исроилдан Фаластин ҳудудларини босиб олишини 12 ой ичида тўхтатиш ва резолюцияга риоя қилмаган тақдирда санкциялар қўллашни талаб қилувчи резолюцияни қабул қилиш учун овоз берди.
Ҳужжатни 124 давлат қўллаб-қувватлади, 14 давлат қарши овоз берди, яна 43 давлат бетараф қолди. АҚШ, Аргентина, Чехия, Венгрия каби давлатлар ҳужжатга қарши чиқди. Ўзбекистон эса Исроил томонидан Фаластин ҳудудлари эгалланишига қарши чиқди ва резолюцияни қўллаб-қувватлади. Германия овоз беришда бетараф қолди.
Исроил резолюцияни мантиқсиз деб атади.
Резолюцияда Исроил қўшинларини Фаластин ҳудудидан олиб чиқиб кетиш, янги аҳоли пунктлари қурилишини тўхтатиш, босиб олинган ер ва мулкларни қайтариш, шунингдек, кўчирилган фаластинликларнинг қайтиши мумкинлиги талаб қилинади. Мажбурий бўлмаган ҳужжат Халқаро Суднинг 1967 йилдан бери босқинчилик "ноқонуний" эканлиги ҳақидаги маслаҳат хулосасига асосланади.
Резолюция Фаластин делегацияси томонидан 2024 йилнинг май ойида БМТ органларидаги ҳуқуқлари кенгайтирилганидан кейин биринчи марта киритилган.
Фаластин маъмуриятининг БМТдаги доимий кузатувчиси Риёд Мансурнинг айтишича, ҳужжатдан мақсад "Халқаро ҳамжамиятнинг Бош Ассамблеядаги босими ва Халқаро суднинг тарихий қарори босимидан фойдаланиб, Исроилни ўз хатти-ҳаракатларини ўзгартиришга мажбур қилишдир".
