Ўзбекистон электр энергиясини Европага экспорт қилмоқчи
Бу ҳақда Энергетика вазири Жўрабек Мирзамаҳмудов Марказий Осиё энергетика вазирларининг биринчи йиғилишида маълум қилган.
Каспий денгизи туби бўйлаб кабел ётқизиш бўйича Қозоғистон-Ўзбекистон-Озарбайжон қўшма уч томонлама лойиҳаси муваффақиятли амалга оширилса, Ўзбекистон 2030 йилдан бошлаб ортиқча электр энергиясини Европага экспорт қила олади.
Бу ҳақда Ўзбекистон Энергетика вазири Жўрабек Мирзамаҳмудов Остонада бўлиб ўтаётган Марказий Осиё энергетика вазирларининг биринчи йиғилишида маълум қилди.
"Жорий йил охирига қадар биз қайта тикланадиган энергия манбаларидан олинадиган умумий энергия қувватини 2030 йилга келиб 20 ГВт дан ортиқроқ даражага етказамиз, шундан икки ГВтдан беш ГВтгача Европага экспорт қилиниши мумкин бўлади", - деган Мирзамаҳмудов.
Унинг сўзларига кўра, экспортнинг аниқ ҳажми электр энергиясини узатиш тизимининг қуввати ва европалик харидорларнинг эҳтиёжларига боғлиқ бўлади.
Вазирнинг тушунтиришича, Ўзбекистондан электр энергияси Қозоғистон орқали Марказий Осиёнинг умумий энергетика тизими орқали, кейин Каспий денгизи туби бўйлаб Озарбайжонга, у ердан Грузияга, сўнгра Қора денгиз туби бўйлаб кабель орқали Руминия, Венгрия ва Болгарияга ўтказилади.
Ўзбекистонни ривожлантириш стратегиясига мувофиқ, 2030 йилга келиб умумий ишлаб чиқариш қуввати 2,4 баробарга – 44,9 ГВтгача оширилади. Шу билан бирга, қайта тикланадиган энергия манбаларининг улуши 40 фоизга етказилади ва бу мақсадда умумий қуввати 18,8 ГВт (8,6 ГВт – қуёш, 10,2 ГВт – шамол) бўлган қуёш ва шамол энергияси ишлаб чиқариш лойиҳалари амалга оширилади.
1 май куни Тошкент инвестиция форуми доирасида Ўзбекистон, Қозоғистон ва Озарбайжон Европага яшил электр энергияси етказиб бериш бўйича энергия тизимларини интеграциялаш бўйича ҳамкорлик меморандумини имзолаган эди.
