"Бекободцемент” менежери талон-торожликда айбланди
У корхонанинг 30 тоннага яқин цемент маҳсулотини бошқага сотиб юборган.
Бекобод шаҳар суди биносидаги очиқ суд мажлисида “Бекободцемент” АЖнинг сотув бўлими ҳудудий менежери лавозимида ишлаб келган айбланувчига суд ҳукми ўқилди. Ҳукм Platina.uz ихтиёрида мавжуд.
Маълум бўлишича, П.А. жами оғирлиги 29,68 тонна бўлган 21.253.106 сўмлик цемент махсулотлари “BTL” МЧЖ учун юборилган бўлсада, ўзганинг мулкини ўзлаштириш мақсадида уни МЧЖга етказиб бермаган. Аксинча маҳсулотни “Home Depot” МЧЖга нақд пул эвазига сотиб юбориб, жамиятнинг 21.253.106 сўмлик мулкини ўзлаштириш йўли билан талон-торож қилган.
Судланувчи П.А суд муҳокамасида унга эълон қилинган айбловга қисман иқрорлигини билдирди. Суд давлат айбловчиси фикрларини, судланувчи, жабрланувчи ва фуқаровий даъвогарнинг кўрсатмаларини тинглаб, иш ҳужжатларини таҳлил қилиб, айб далиллар билан тўлиқ исботланган деб ҳисоблайди.
Суд ҳужжатларига кўра, судланувчи М-400 маркали цемент махсулотларини ҳар бир килограммини 530 сўмдан сотишга келишган.
Якуний ҳукмга кўра, П.А. 1 (бир) йил муддатга корхона, муассаса ва ташкилотларда моддий жавобгарлик юклатилган лавозимларда ишлаш ҳуқуқидан маҳрум қилиниб, иш ҳақининг 15 фоиз миқдорини давлат даромади ҳисобига ушлаб қолган ҳолда 1 (бир) йил 6 (олти) ой муддатга муддатга ахлоқ тузатиш ишлари жазоси тайинланди. Шунингдек, П.А Тошкент вилояти ИИББ ҳузуридаги Тергов бошқармаси депозит ҳисоб рақамига 21 253 106 сўм тўлаган. У етказилган зарарларни қоплашга қаратилади.
