Қозоғистон ягона вақт минтақасига ўтди

Бугун, 1 мартдан Қозоғистон ягона вақт минтақасига ўтди.  “Қозоғистон Республикаси ҳудудида вақтни ҳисоблаш тартиби тўғрисида”ги ҳукумат қарорига киритилган ўзгартиришларга кўра, жорий йилнинг 1 мартидан бошлаб бутун Қозоғистон ҳудуди ягона UTC+5 соат минтақасига ўтади.

Остона, Олмаота, Чимкент, Ақмола, Олмаота, Жамбил, Қарағанда, Қўстанай, Павлодар, Шимолий Қозоғистон, Туркистон, Шарқий Қозоғистон вилоятлари ҳамда Абай, Жетису, Улитов вилоятларида 29 февралдан 1 мартга ўтар кечаси соат 00:00 да соат миллари 1 соат орқага сурилди.

Атирау, Оқтўби, Ғарбий Қозоғистон, Манғистау ва Қизилўрда вилоятлари UTC+5 соат зонасида жойлашгани боис вақт аввалгидек қолади.

Маълумки, ҳозиргача Қозоғистонда иккита вақт зонаси UTC+5 ва UTC+6 қўллаб келинган. Мамлакат ҳудудининг катта қисми (ғарбий вилоятлар бундан мустасно) UTC+6 зонасида жойлашган.

Мутахассисларнинг фикрича, соат зоналарининг бир хил қилингани ҳудудлар аҳолиси ўртасидаги вақт билан боғлиқ муаммоларни бартараф этиш, транспорт ва бошқа коммуникациялар фаолиятини мувофиқлаштириш, бизнес юритиш ҳамда давлат органлари ва фавқулодда вазиятлар хизматларининг ўзаро ҳамкорлик қилиш жараёнлари учун катта қулайлик туғдиради.

Бироқ аҳоли ўртасида турли электрон гаджетларда вақт автоматик равишда ўзгарадими ёки қўлда ўзгартириш керакми, деган саволлар кўпайган. Мутахассисларнинг айтишича, бу қандай гаджет эканлиги ва интернет орқали вақтни синхронлаштириш функцияси ёқилганми-йўқми, шу каби омилларга боғлиқ. Лекин ҳар эҳтимолга қарши соат, смартфон ва компютерлардаги вақтни текшириб қўйиш ёки интернетга уланиб, операцион тизим ва иловаларни янгилаш тавсия этилмоқда.

Шунингдек, Қозоғистондаги банк ва мобил операторлар айрим хизматларда узилиш ва муаммолар юзага келиш эҳтимоли ҳақида мижозларни огоҳлантирган. Шу боис ҳар эҳтимолга нақд пул ғамлаб олиш ва зарур ҳолларда банк ва компанияларга зудлик билан мурожаат қилиш тавсия қилинган.