Халқаро Конвенцияни ратификация қилган 47 давлат қаторига Ўзбекистон ҳам қўшилди

Сенатнинг қирқинчи ялпи мажлисининг иккинчи кунида “Халқаро меҳнат ташкилотининг ходимларни иш жойидаги ҳавонинг ифлосланиши, шовқин ва тебранишлар туфайли юзага келадиган касбий хавф-хатардан ҳимоя қилиш тўғрисидаги 148-сонли Конвенциясини (Женева, 1977 йил 20 июн) ратификация қилиш ҳақида”ги Қонун кўриб чиқилди.

Сенаторлар томонидан Конвенцияни ратификация қилишда тизимли назорат чораларини, шу жумладан, иш жойларида меҳнат шароитларини, зарарли ва хавфли ишлаб чиқариш омилларини, меҳнат жараёнларининг оғирлиги ва тиғизлигини ҳамда асбоб-ускуналарнинг жароҳатлаш хавфлилигини баҳолаш белгилангани маълум қилинди.

Таъкидлаш керак, ушбу Конвенция жаҳоннинг 47 та давлати томонидан ратификация қилинган. “Ҳечдан кўра кеч яхши” деганларидек, ниҳоят Ўзбекистон парламенти ҳам уни ратификация қилди. 

Мажлисда ушбу Конвенциянинг ратификация қилиниши миллий қонунчиликни такомиллаштиришга, меҳнатни муҳофаза қилиш ва хавфсизлик бўйича халқаро стандартларнинг самарали жорий этилишини таъминлашга хизмат қилишини, шунингдек, мамлакатимизнинг ходимлар ҳуқуқлари кафолатларини таъминлаш бўйича асосий халқаро тамойил ва стандартларга содиқлигини намойиш этишини таъкидланди.

Муҳокамалардан сўнг Қонун сенаторлар томонидан маъқулланди.