Шавкат Мирзиёев яна Қирғизистонга боради
Саммитда икки минтақа ўртасидаги сиёсий, савдо-иқтисодий ва маданий-гуманитар ҳамкорлик режалари муҳокама қилиниши режалаштирилган.
Шавкат Мирзиёев бу йил ҳисобидан иккинчи марта Қирғизистонга боради ва Чўлпон-Ота шаҳрида ўтадиган «Марказий Осиё - Европа иттифоқи» саммитида қатнашади.
2-3 июнь кунлари бўладиган саммитда Ўзбекистон, Қирғизистон, Қозоғистон ва Тожикистон давлатлари раҳбарлари, Туркманистон бош вазири ўринбосари ва Европа кенгаши президенти Шарл Мишел қатнашади.
Саммитда икки минтақа ўртасидаги сиёсий, савдо-иқтисодий ва маданий-гуманитар ҳамкорлик режалари муҳокама қилиниши режалаштирилган.
Бу Марказий Осиё давлатлари раҳбарларининг Шарл Мишел билан иккинчи учрашувидир. Биринчиси ўтган йилнинг кузида Остона шаҳрида бўлган эди.
Мирзиёев Қирғизистонга сўнгги марта шу йил бошида борганди. Ўшанда бир қатор келишувлар, жумладан, чегарадан паспортсиз ўтиш ҳақида шартномалар имзоланган эди.
