"Ювентус"дан яна очко олиб қўйилди
Молиявий фирибгарлик учун "Ювентус"дан 10 очко тортиб олинди. Бу эса жамоанинг халқаро турнирда иштирок этишига тўсиқ бўлиши мумкин.
Италия футбол федерациясининг апелляция суди клубни молиявий фирибгарлик учун жазолаш тўғрисида қарор чиқарди. Бу ҳақда журналист Жанлука Ди Марцио маълум қилди.
Бунга қадар "Ювентус" Италия А Серияси турнир жадвалида 69 очко билан 2-ўринда кетаётганди. Аммо 10 очко тортиб олинганидан кейин туринликлар 59 очко билан 7-ўринга тушиб кетди. Натижада жамоа Европа Чемпионлар лигаси ва Европа Лигасида иштирок этиш ҳуқуқидан маҳрум бўлиши мумкин.
Эслатиб ўтамиз, январь ойида "Ювентус" 15 очкодан маҳрум бўлганди, аммо апелляция натижасида уларнинг очколари қайтарилди. Кейинчалик янги далиллар келиб тушганлиги сабабли иш қайта очилди.
