Сурхондарёда "CEFR" cертификатини олиб беришни ваъда қилган фирибгар ушланди
У юқори лавозимда ишловчи танишлари ёрдамида олиб беришни иддао қилган.
Бош прокуратура ҳузуридаги Департаментнинг Сурхондарё вилоят бошқармаси томонидан ДХХ ва ИИБ ходимлари билан ҳамкорликда Термиз шаҳрида тезкор тадбир ўтказди.
Унда фуқаро Н.М. фуқаро С.Ж.га гўёки юқори лавозимда ишловчи танишлари ёрдамида “CEFR” чет тилларини билиш сертификатини олиб бериш эвазига 2 400 АҚШ долларини олган вақтида ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
- Маълумот учун
CEFR – Европа Иттифоқида қўлланиладиган чет тилини билиш даражалари тизимидир. Европа Кенгаши томонидан 1989—1996 йиллар оралиғида "Европа фуқаролигини олиш учун тил ўрганиш" лойиҳасининг асосий қисми сифатида ишлаб чиқилган. CEFR тизимининг асосий мақсади барча Европа тиллари учун қўлланиладиган баҳолаш ва ўқитиш усулини тақдим этишдан иборат.
