Бир кунда 200, бир ойда эса 6 000 000 сўм фойда...

Жиззах вилояти Пахтакор туманида 14-30 ёшдаги 18200 нафар фуқаро истиқомат қилади. Шундан 485 нафари ёшлар дафтари рўйхатига киритилган бўлиб, 410 нафарига амалий ёрдам берилган. Жумладан, 31 нафар ёшларга ҳарбий хизмат тўловлари тўлаб берилган бўлса, 344 нафарига тижорий банклар томонидан кредит ажратилган. 

Ана шундай кредит олиб, ўзининг тадбиркорлигини бошлаган ёшлардан бири туманнинг Самарқанд маҳалласида яшовчи Музаффар Синдоров.

–  Аввал ҳам “мойка”ларда ишлардим, фақат даромадим 50/50 тақсимланарди. Мисол учун битта машина неча пулга ювилса, ўшани тенг ярми чўнтагимга, қолган ярми кассага тушарди. Ҳозир қанча ишласам ўзимники. 33 миллион миқдорида имтиёзли  кредит олдим. Ана шу “мойка”да нима аппарат бўлса, ўшани шу кредит пулига олганман. 

Мана кредитим, майда-чуйда ишлатадиган харажатларимдан орттириб, олдинги ишлаганимдан кўра ҳозирги даромадим яхши. Кунига 200-300 минг, яхши иш бўлса 400-500 минг ҳам тушади. Энди уни харажатимдан чиқариб ташлаб туриб, 1 кунда 300 минг ишласам, 100 минг харажатимга чиқарса, 200 минг соф фойда қиляпман.

Аввалига Шоҳруҳнинг укаси акасига ёрдам бераётганди, энди эса укаси ҳам акасидан ўрнак олиб, маҳалланинг бошқа ҳудудидан худди шундай  автомобиль ювиш шахобчаси очди. Албатта бунда маҳалла ёшлар етакчисининг ёрдами катта.

Маҳалла ёшлар етакчиси Аббос Исоқуловнинг маълум қилишича, ҳозирги кунда маҳалладаги 14-30 ёшлилар аҳволи ўрганилиб, ижтимоий ҳимояга муҳтож ёшлар “Ёшлар дафтари”га тавсия қилинмоқда. 

Яна имтиёзли кредит маблағи  ажратилган ёшлар бор. Хотин-қизларга эса тадбиркорлик қилиши учун тикиш машиналари олиб берилган. Ижтимоий ҳолати оғир ёшларнинг аксариятига бир марталик моддий ёрдам кўрсатилган. 

Соғлигида муаммоси бўлган ёшларнинг даволаниш харажатлари белгиланган тартибларга асосан тўлаб берилмоқда.