Жамоатчилик назорати: бунга ким ва нима учун рухсат берган?

Твиттер фойдаланувчиси Ферузбек Сайфуллаев ушбу ҳолат ҳақида 2 кун аввал пост жойлаган.

Суратларга эса “Тошкент шаҳри, Сергели тумани Қипчоқ кўчасидаги Чинор дарахтлари манашу куйга солинибди” дея изоҳ қолдирган.

Шунингдек, маълумот сифатида Чинор дарахти (Шарқий платан)  бизда 4 йилдан буён Ўзбекистон Қизил Китобига киритилганини қайд этган. 

Жамоатчилик назорати сифатидаги ушбу постни твиттерда улашаркан, “Бунга ким ва нима учун рухсат бергани ҳозирча номаълум. Лекин бу дарахтларнинг уволи уради ҳали”, деб ёзиб қолдирган. 

Суратлардан кўриш мумкинки, ушбу ҳолат ҳудуддаги қурилиш объектида кузатилган.

Аммо орадан икки кун ўтган бўлса-да, на Табиат ресурслари вазирлиги, на Қурилиш ва уй-жой коммунал хўжалиги вазирлиги бирор муносабат бермаган. Биз бу ҳолатга ҳар иккала вазирлик муносабат билдиришига умид қилиб қоламиз.