Миграция агентлиги Россиядаги ўзбекистонликларни қаттиқ огоҳлантирди
Россия қонунчилигига кўра, наркотик моддаларни сотиш ёки етказиб бериш учун узоқ муддатли қамоқ жазоси белгиланган.
Ташқи меҳнат миграцияси агентлиги Россияда ишлаётган ўзбекистонликларни қаттиқ огоҳлантирди.
"Сўнгги вақтларда Россияда ишлаётган юртдошларимиз орасида Интернет орқали катта пул эвазига маҳсулотларни бир манзилдан иккинчи манзилга етказиб бериш ҳақидаги эълонлар бўйича муаммолар юзага келмоқда.
Мурожаатлардан маълум бўлмоқдаки, норасмий курерлик хизматларида наркотик ёки тақиқланган моддалар солинган буюртмаларни етказиб бериш (закладка) таклиф қилинмоқда ва бунинг оқибатида полиция ходимлари томонидан улар ушланиб, жиноий жавобгарликка тортилмоқда.
Шу муносабат билан, юртдошларимиздан норасмий курерлик хизматларида ишламасликни, катта миқдордаги пул эвазига шубҳали буюмларни бир манзилдан иккинчи манзилга етказиб бермасликни ёки маҳсулотни албатта текширишни сўраймиз" дейилади агентлик хабарида.
Россия қонунчилигига кўра, наркотик моддаларни сотиш ёки етказиб бериш учун узоқ муддатли қамоқ жазоси белгиланган.
Эслатиб ўтамиз, сўнгги вақтларда ОАВда Россияда ишлаётган мигрантлар турли айбловлар билан қамалиб, Украинадаги урушга жўнатиб юборилаётгани ҳақида хабарлар бот-бот эълон қилинмоқда.
