Боласи сиропдан ўлган гамбияликлар ҳинд компаниясини судга берди
Ўзбекистонда ҳам йигирмадан зиёд бола “Aмбронол” ва “ДОК-1 Макс” сироплари истеъмолидан сўнг вафот этганди.
Гамбияда йўтал сиропи ичиш ортидан вафот этган йигирма нафар боланинг қариндошлари Ҳиндистоннинг Maiden Pharmaceuticals компанияси ҳамда маҳаллий ҳокимиятни судга берди. Бу ҳақда Reuters ёзмоқда.
Ҳали оммага эълон қилинмаган ариза ўтган йили Гамбияда ўткир буйрак етишмовчилигидан вафот этган етмишга яқин чақалоқ ва болалар иши бўйича янги жабҳа очиши кутилмоқда.
Ҳужжат жума куни Гамбия Олий судига тақдим этилди. Унда оилалар ҳар бир бола учун тахминан 250 000 доллар товон пули талаб қилмоқда, бу 20 нафар бола учун тахминан 5 миллион доллар маблағни ташкил этади.
Оилалар, шунингдек, Гамбия Соғлиқни сақлаш вазирлиги, Наркотик моддаларни назорат қилиш агентлиги ва маҳаллий дистрибютор Atlantic Pharmaceuticals компаниясини судга беришмоқда.
Гамбия суд ҳокимияти вакили даъво аризаси берилганини тасдиқлади. Даъвода кўрсатилган томонларнинг ҳеч бири, шу жумладан Maiden компанияси ОАВнинг сўровларига жавоб бермаган.
“Оилаларнинг бошидан кечирганларини ҳис қилиш учун фарзандли бўлиш шарт эмас. Бу жуда қўрқинчли”, дейди иш бўйича шуғулланаётган бош адвокат Лубна Фараж.
Эслатиб ўтамиз, 2022 йил декабрида Гамбияда 66 бола йўтал сиропи қабул қилиниши ортидан вафот этганди.
Афсуски, бунга ўхшаш воқеалар Ўзбекистон учун ҳам бегона эмас. Ўтган йили охирида йигирмадан зиёд бола “Aмбронол” ва “ДОК-1 Макс” сироплари истеъмолидан сўнг вафот этганди. Сўнгра, ушбу маҳсулотларни ишлаб чиқарган Marion Biotech компанияси заҳарли саноат маҳсулотидан фойдалангани аниқланди.
