Робахон Маҳмудованинг судялик ваколатлари тўхтатилди
Судьялар олий малака ҳайъати президентликка номзод бўладиган Ўзбекистон Олий суди раисининг биринчи ўринбосари Робахон Маҳмудованинг судялик ваколатларини тўхтатиб туриш тўғрисида қарор қабул қилди.
2023 йил 12 май куни Ўзбекистон Республикаси "Адолат" социал-демократик партияси Пленумида мазкур партиядан Ўзбекистон Республикаси Президентлигига бўлажак номзод сифатида Робахон Анваровна Махмудова номзоди илгари сурилди.
Қонунчиликка кўра судья сиёсий фаолият билан шуғулланишга ҳақли эмас.
Сайлов кодексига асосан сиёсий партия Ўзбекистон Республикаси Президентлигига ўз партияси аъзолари орасидан ёки партиясизни номзод этиб кўрсатишга ваколатлидир.
Шу муносабат билан бугун Судьялар олий малака ҳайъати Р. А. Махмудованинг аризаси ва суд қонунчилигига мувофиқ Ўзбекистон Республикаси Олий суди раисининг биринчи ўринбосари – маъмурий судлов ҳайъатининг раиси Р. А. Махмудованинг судьялик ваколатларини тўхтатиб туриш ҳақида қарор қабул қилди.
