Сирдарёлик хонандани чув туширишди
"Водий садоси" радиосида ишловчи шахс сифатида таништириб, сирдарёлик хонанданинг ишончига кириб, фирибгарлик йўли билан 2 млн 800 минг сўм пулни олган йигит аниқланди.
Сирдарёлик хонандани чув туширган шахс аниқланди. Бу ҳақда Ўзбекистон Республикаси ИИВ ҳузуридаги Тергов департаменти хабар берди.
Маълум қилинишича, жорий йилнинг 24 март куни Сирдарё тумани А.Темур кўчасида яшовчи 39 ёшли Х.Ш. ариза билан мурожаат қилиб, унда номаълум бўлган шахс унинг телефон рақамига қўнғироқ қилиб, ўзини “Водий садоси” радиосида ишловчи “Музаффар Очилов” деб таништирган.
Унинг қўшиқларини радиода реклама қилиб бериш эвазига ундан икки маротаба 1.200.000 сўмдан жами 2.400.000 сўм ҳамда "ZO'R TV" каналига чиқариб бериш учун 400.000 сўм пулларини 9860 60 **** 3895 рақамли пластик картасига ташлаш йўли билан қўлга киритганлигидан сўнг ваъдасига кўра унинг қўшиқларини радиода реклама қилиб бермасдан алдаб кетганлигини ва уни сўраб суриштирган вақтида ўзини “Музаффар Очилов” деб таништирган шахс радио соҳасида ишламаслигини билганлигини маълум қилиб, ушбу шахсни аниқлашда ва пулларини ундириб беришда амалий ёрдам сўраган.
Олиб борилган тергов-тезкор ҳаракатлари натижасида, “Музаффар Очилов” деб ўзини таништирган шахс аслида ҳеч қаерда ишламайдиган, Андижон вилоятида яшовчи 28 ёшли Ю.О. эканлиги аниқланган.
Мазкур ҳолат юзасидан Сирдарё тумани ИИБ ҳузуридаги Тергов бўлими томонидан Ю.О.га нисбатан Ўзбекистон Республикаси Жиноят кодекснинг 168-моддаси 3-қисми “б” банди (фирибгарлик) билан жиноят иши қўзғатилган.
